చైనాలోని వుహాన్ వైరాలజీ ల్యాబ్ నుంచే కరోనా వైరస్ బయటకు వచ్చినట్లు కచ్చితంగా చెప్పగలమన్నారు అమెరికా విదేశాంగ మంత్రి మైక్ పాంపియో. ఇందుకు సంబంధించిన ఆధారాలు తవ వద్ద ఉన్నాయని, ఇప్పుడే వాటిపై స్పందించలేమని ఓ టీవీ ఛానల్కు ఇచ్చిన ముఖాముఖిలో చెప్పారు.
వుహాన్ ల్యాబ్ నుంచి వైరస్ ఉద్భవించలేదని ఎవరైనా ఆధారాలతో రుజువు చేస్తే సమ్మతమే అన్నారు పాంపియో. దీనిపై పూర్తిగా స్పష్టత రావడానికి వుహాన్ ల్యాబ్ను పరిశీలించేందుకు చైనా తమకు అనుమతి ఇవ్వాలని డిమాండ్ చేశారు.
" వుహాన్ నుంచే వైరస్ బయటకు వచ్చిందని మాకు తెలుసు. డిసెంబర్లోనే చైనాకు వైరస్ గురించి తెలుసు. త్వరితగతిన చర్యలు చేపట్టలేకపోయింది. ప్రపంచ ఆరోగ్య సంస్థ కూడా విఫలమైంది. చైనా పట్ల సానుకూల వైఖరితోనే వైరస్ గురించి ప్రపంచాన్ని అప్రమత్తం చేయలేకపోయింది. అందుకే ఇప్పుడు ఈ పరిస్థితి తలెత్తింది. వైరస్ ప్రమాదకరమని చెప్పిన వైద్యులను చైనా ప్రభుత్వం ఏం చేసిందో మనం చూశాం. కప్పిపుచ్చుకునే ప్రయత్నంలో భాగంగానే అమెరికాపై చైనా ఆరోపణలు చేసింది. "
-మైక్ పాంపియో, అమెరికా విదేశాంగ మంత్రి
అమెరికాపై కరోనా వైరస్ తీవ్ర ప్రభావం చూపింది. ఆ దేశంలో 70వేల మందికిపైగా ప్రాణాలు కోల్పోయారు. 12లక్షల మందికిపైగా పాజిటివ్గా తేలింది.