ఫ్లోరిడా విమానాశ్రయంలో వచ్చిపోయే విమానాలపై లేజర్లైట్లు ప్రయోగిస్తూ ఇబ్బందులకు గురిచేస్తున్న ఓ వ్యక్తిని పోలీసులు అరెస్ట్ చేశారు. అతని వింతచేష్టల కారణంగా ఓ పైలట్ గాయపడ్డాడు.
ఇదీ జరిగింది...
చార్లీ చాప్మన్ అనే వ్యక్తి కొంత కాలంగా విమానాలపై లేజర్లైట్లు ప్రయోగిస్తూ.. పైలట్లను ఇబ్బందులకు గురిచేస్తున్నాడు. దీనిపై పైలట్లు ఉన్నతాధికారులకు ఫిర్యాదు చేశారు. గత వారం ఫ్లోరిడాలోని సరసోటా బ్రాడెంటోన్ విమానాశ్రయంలో నాలుగు సార్లు విమానాలపై లేజర్ కిరణాలను ప్రయోగించాడు. అదే క్రమంలో పోలీసుల హెలికాఫ్టర్పైనా లేజర్లైట్ వేశాడు.
లేజర్ లైట్ల ఘటనపై ఓ పైలట్ ఫిర్యాదు చేస్తూ... ఆ కిరణాల కారణంగా తనకు తాత్కాలికంగా కంటి చూపు మందగించిందని పేర్కొన్నాడు. అక్కడున్న కెమెరాల్లో ఓ వ్యక్తి... పోలీసుల హెలికాఫ్టర్పై వస్తువులు విసురుతున్నట్లు దృశ్యాలు నమోదయ్యాయి.
స్టన్గన్తో నిందితుడికి షాక్!
విమానాశ్రయంలో లేజర్ కిరణాల ఘటనపై పలువురు పైలట్లు ఫిర్యాదు చేసిన క్రమంలో రంగంలోకి దిగారు పోలీసులు. ఆగంతుకుడిని గుర్తించి పట్టుకునేందుకు ప్రయత్నించారు. అయితే.. అతని వద్దకు పోలీసులు వెళ్లిన సమయంలో వారిపైకి సుత్తితో దాడి చేసేందుకు ప్రయత్నించాడు. అతణ్ని అదుపు చేసేందుకు పోలీసులు స్టన్గన్ వినియోగించారు. నిందితుడి నుంచి లేజర్ కిరణాల పరికరాన్ని స్వాధీనం చేసుకుని అరెస్ట్ చేశారు.
ఇదీ చదవండి:కంచెను ఢీకొని కూలిన విమానం.. నలుగురు మృతి
