జైలులో 'అమ్మ'ల ఫ్యాషన్ షో అదుర్స్ పెరు రాజధాని లిమాలో 'మదర్స్ డే'ను పురస్కరించుకుని జైలులోని అమ్మల కోసం ప్రత్యేక ఫ్యాషన్ షో నిర్వహించారు. మహిళా ఖైదీలు తయారు చేసిన దుస్తులు, బ్యాగ్లు, నగలు, పెళ్లి గౌనులు, షూలు ధరించి వయ్యారంగా నడిచారు అక్కడి అమ్మలు.
'ద హార్ట్ ఆఫ్ ఏ ఉమెన్' పేరుతో ఈ కార్యక్రమాన్ని నిర్వహించారు. ఖైదీలు విడుదలయ్యాక ఉపాధి దక్కాలనే గొప్ప ఆలోచనతో ఇక్కడ వారికి ప్రత్యేక శిక్షణనిస్తున్నారు. 'ప్రొడక్టివ్ ప్రిజన్స్' పేరుతో ఈ శిక్షణ తరగతులు నిర్వహిస్తున్నారు.
జైలు జీవితం గడిపిన కొంత మంది విడుదలయ్యాక ప్రైవేటు సంస్థల్లో ఉద్యోగాలు సంపాదించారు. మరి కొంతమంది నగల తయారీ సంస్థలకు యజమానులుగా ఎదిగారు.
"ఈ నైపుణ్యాన్ని ఇక్కడే (జైలు)లో సంపాదించాను. ఇక్కడ నేర్చుకున్న ఈ విద్య ద్వారా నా చేతుల్తో ఇలాంటి గొప్ప వస్తువులు తయారు చేస్తానని ఊహించలేదు. ప్రస్తుతం మేము చెప్పుకోదగ్గ నగలు, కొత్త డిజైన్లు తయారు చేయగలుగుతున్నాం. ఇది కచ్చితంగా సృజనాత్మకతే."
-అలిజాండ్రా జిగర్రా, ఖైదీ
పెరులోని చొరిజో కారాగారంలో 740 మంది మహిళా ఖైదీలు ఉన్నారు. ఇందులో అధిక శాతం మాదకద్రవ్యాల తరలింపులో పట్టుబడినవారే.
