అంతరిక్ష కేంద్రానికి క్రిస్మస్​ బహుమతులు​ పంపిన స్పేస్​ఎక్స్​

అంతరిక్ష కేంద్రంలోని వ్యోమగాములకు క్రిస్మస్​ బహుమతులను పంపించింది స్పేస్​ ఎక్స్​. వాటితో పాటు వివిధ పరిశోధన పరికరాలతో నింపిన సరికొత్త, డబుల్​ డ్రాగన్​ నౌకను కెన్నెడీ అంతరిక్ష పరిశోధన కేంద్రం నుంచి పాల్కన్​-9 రాకెట్​ ద్వారా నింగిలోకి పంపించింది.

అంతరిక్ష ప్రయోగాల్లో దూసుకెళుతోంది స్పేస్​ఎక్స్​. తాజాగా అంతర్జాతీయ అంతరిక్ష కేంద్రం (ఐసీఎస్​)లోని వ్యోమగాములకు క్రిస్మస్​ బహుమతులతో పాటు, పరిశోధన పరికరాలతో కూడిన సరికొత్త, అతిపెద్ద డబుల్​ డ్రాగన్​ నౌకను నింగిలోకి పంపింది. దీని ద్వారా తొలిసారి రెండు క్యాప్సు​ల్స్​ను ఒకేసమయంలో పంపించిన ఘనత సాధించింది.

నాసాకు చెందిన కెన్నెడీ అంతరిక్ష పరిశోధన కేంద్రం నుంచి స్పేస్​ ఎక్స్​ పాల్కన్​-9 రాకెట్​ ద్వారా ఈ కొత్త డ్రాగన్​ నౌకను అంతరిక్షంలోకి పంపారు శాస్త్రవేత్తలు. వ్యోమగాముల క్రిస్మస్ విందు కోసం కాల్చిన టర్కీ, కార్న్ బ్రెడ్ డ్రెస్సింగ్, క్రాన్బెర్రీ సాస్, షార్ట్ బ్రెడ్ కుకీలు, ఐసింగ్ గొట్టాలను తీసుకువెళుతోంది డ్రాగన్​. ఈ నౌక సోమవారం(నేడు) మధ్యాహ్నం ఐఎస్​ఎస్​కు చేరుకుంటుంది. నెలరోజుల పాటు అక్కడే ఉండనుంది.

"మీరు చూస్తున్న ప్రతిచోట డ్రాగన్స్​ ఉంటాయి. నాసా వాణిజ్య ఒప్పందాలు కొనసాగుతున్న క్రమంలో.. అంతరిక్ష కేంద్రంలో ఎల్లప్పుడూ ఒక డ్రాగన్​ క్యాప్సుల్​​ ఉండాలని స్పేస్​ఎక్స్​ భావిస్తోంది. ఈ ప్రయోగం మొత్తం.. నాసా వ్యోమగామి కేట్​ రుబిన్స్​కు క్రిస్మస్​ బహుమతిగా చేపట్టిందే."

- కెన్నీ టోడ్​, నాసా, అంతరిక్ష కేంద్ర ప్రోగ్రామ్​ డిప్యూటీ మేనేజర్​.

డ్రాగన్​ నౌక ద్వారా అంతరిక్ష కేంద్రానికి సుమారు 6,400 పౌండ్లు (2,400కిలోలు) వస్తువులు పంపారు. అందులో బిలియన్ల కొద్ది సూక్ష్మజీవులు (మాక్రోబ్స్​), బయోమైనింగ్ అధ్యయనం కోసం పిండిచేసిన గ్రహశకల నమూనాలు, వ్యోమగాముల రాపిడ్​ బ్లడ్​ టెస్ట్​ కోసం కొత్త కిట్టు, కళ్లు, ఎములపై ప్రయోగాలు చేసేందుకు 40 ఎలుకలను ఇందులో పంపారు.

గత నెలలో నలుగురు వ్యోమగాములను అంతరిక్షానికి పంపించింది స్పేస్​ఎక్స్​. నాసా కోసం 2012 నుంచి అంతరిక్ష కేంద్రానికి 21 ప్రయోగాలు చేపట్టింది స్పేస్​ ఎక్స్​.

ఇదీ చూడండి:నింగిలోకి దూసుకెళ్లిన స్పేస్​ ఎక్స్ వ్యోమనౌక