చారిత్రకం: ఉత్తర కొరియాలో కాలుమోపిన ట్రంప్​

ఉత్తర కొరియా భూభాగంలో అడుగుపెట్టారు అమెరికా అధ్యక్షుడు డొనాల్డ్​ ట్రంప్​. ఈ దేశంలో అగ్రరాజ్యం అధ్యక్షుడు అడుగుపెట్టటం ఇదే తొలిసారి. ఉభయ కొరియాల సరిహద్దు ప్రాంతంలో కిమ్​ జోంగ్​ ఉన్​ను కలిశారు ట్రంప్. అధ్యక్షుని పర్యటనతో ఇరుదేశాల మధ్య సంబంధాలు బలోపేతమవుతాయని కిమ్​ ఆశాభావం వ్యక్తం చేశారు.

ఉత్తర కొరియా భూభాగంలో అడుగుపెట్టి చరిత్ర సృష్టించారు అమెరికా అధ్యక్షుడు డొనాల్డ్​ ట్రంప్​. అమెరికా అధ్యక్షుడు ఉత్తర కొరియాలో అడుగుపెట్టటం ఇదే తొలిసారి. ఉభయ కొరియాల సరిహద్దుల్లోని డీఎంజీ(సైనికరహిత) ప్రాంతానికి వచ్చిన ట్రంప్​ను కిమ్​ జోంగ్​ ఉన్ కలిశారు. ఇరు దేశాధినేతలు కరచాలనం చేసుకుని ఆత్మీయంగా పలకరించుకున్నారు.

అనుకోకుండా ఇక్కడికి వచ్చి కిమ్​ను కలవటం సంతోషంగా ఉందన్నారు ట్రంప్​. ద్వైపాక్షిక సంబంధాల్లో ఇప్పటికే ఎంతో పురోగతి సాధించినట్లు పేర్కొన్నారు. తాము కలిసిన మొదటి రోజు నుంచే ఇరువురి స్నేహబంధం బలపడిందన్నారు ట్రంప్.

అమెరికా అధ్యక్షుడు తమ దేశంలో అడుగుపెట్టటం పై హర్షం వ్యక్తం చేశారు కిమ్​. ట్రంప్ చారిత్రక పర్యటన భవిష్యత్తుపై మరింత నమ్మకం పెంచిందన్నారు.

ఇదీ చూడండి: 'ప్రతి నీటి బొట్టును ఒడిసిపడితేనే భవిత'