ప్రపంచవ్యాప్తంగా కొవిడ్(Covid-19) మరణాలు, కేసులు మరోసారి పెరగడం.. సాధారణ పరిస్థితులకు తిరిగి చేరతామనే ఆశలకు గండికొడుతోంది. మరోమారు ఆంక్షల విధింపు ఉంటుందనే ఆందోళన నెలకొంది. వరుసగా 9 వారాలపాటు తగ్గుతూ వచ్చిన కరోనా మరణాలు గతవారం పెరిగాయని ప్రపంచ ఆరోగ్య సంస్థ (డబ్ల్యూహెచ్ఓ) బుధవారం వెల్లడించింది. ఏకంగా 55 వేల మంది కరోనాకు బలయ్యారని, అది అంతకుముందు వారంతో పోలిస్తే 3శాతం అధికమని తెలిపింది. బ్రెజిల్, భారత్, ఇండోనేషియా, బ్రిటన్లో అత్యధిక కేసులతో అంతకుముందు వారంతో పోలిస్తే గతవారం 10 శాతం పెరిగి దాదాపు 30లక్షల కేసులు నమోదైనట్లు డబ్ల్యూహెచ్ఓ తెలిపింది.
కొంపముంచిన నిర్లక్ష్యం..
అయితే అత్యల్ప స్థాయిలో టీకా పంపిణీ(Vaccination), మాస్కులు ధరించకపోవడం, ఆంక్షల సడలింపు సహా ఉద్ధృతంగా వ్యాపిస్తున్న డెల్టా వేరియంటే పరిస్థితి దిగజారడానికి కారణమని డబ్ల్యూహెచ్ఓ విశ్లేషించింది. ప్రస్తుతం 111 దేశాల్లో డెల్టా రకం వైరస్ను గుర్తించగా, రాబోయే రోజుల్లో అది మరింత తీవ్ర రూపం దాల్చనుందని అంచనా వేస్తోంది.