'మరణాలు పెరిగినా.. నేనేమీ అద్భుతాలు చేయలేను'

బ్రెజిల్​లో కరోనా వైరస్​ విజృంభిస్తోంది. అయినప్పటికీ ఆ దేశాధ్యక్షుడు బొల్సొనారో వైఖరిలో మార్పురావడం లేదు. తాజాగా బ్రెజిల్​లో మరణాల సంఖ్య చైనాను దాటింది. దీనిపై ప్రశ్నించగా.. 'నేనేమీ అద్భుతాలు చేయలేను' అంటూ సమాధానిమిచ్చి మరోమారు వార్తల్లో నిలిచారు అధ్యక్షుడు.

కరోనాను ఎదుర్కొంటున్న తీరుతో బ్రెజిల్​ అధ్యక్షుడు బొల్సొనారో చర్చనీయాంశమయ్యారు. తాజాగా దేశంలోని కరోనా మరణాలపై స్పందించిన తీరుతో మరోమారు వార్తల్లో నిలిచారు బొల్సొనారో.

బ్రెజిల్​లో వైరస్​ కేసులు రోజురోజుకూ పెరుగుతున్నాయి. ఇప్పటివరకు 71వేల మందికిపైగా వైరస్​ బారినపడ్డారు. తాజాగా మరణాల సంఖ్య(5,017) చైనాను దాటింది. దీనిపై ప్రశ్నించగా.. తానేమీ అద్భుతాలు చేయలేనని జవాబిచ్చారు అధ్యక్షుడు.

"మరణాల సంఖ్య పెరిగితే నన్నేం చేయమంటారు? నేనేనీ అద్భుతాలు చేయలేను."

--- బొల్సొనారో, బ్రెజిల్​ అధ్యక్షుడు.

కరోనా​తో ప్రపంచ దేశాలు బెంబేలెత్తుతుంటే... వైరస్​ను చిన్న ఫ్లూగా అభివర్ణించి అనేకమంది నుంచి విమర్శలు ఎదుర్కొన్నారు బొల్సొనారో.

మరోవైపు బ్రెజిల్​లోని మనౌస్​ నగరం వైరస్​కు కేంద్ర బిందువుగా మారింది. మృతదేహాలకు ఖననం చేసేందుకు పబ్లిక్​ సిమెంటరీ(శ్మశానవాటిక)ను తెరవాల్సి వచ్చింది. రాత్రి పూట కూడా ఇది పనిచేస్తోంది.