బోయింగ్​పై నిషేధం

ఇథియోపియాలో విమాన ప్రమాదం జరిగిన తర్వాత ​బోయింగ్​ 737 మ్యాక్స్​ విమానాలను అనేక దేశాలు నిషేధిస్తున్నాయి. భద్రతా ప్రమాణాలపై హామీ లభిస్తేనే నిషేధాలను ఎత్తివేస్తామని స్పష్టం చేస్తున్నాయి. అయితే ప్రయాణికుల భద్రతకే పెద్దపీట వేస్తామని బోయింగ్​ సంస్థ చెబుతోంది.

బోయింగ్ 737 మ్యాక్స్​​ విమానాలను పలు దేశాలు నిషేధించాయి. భద్రతా ప్రమాణాలపై సంస్థ హామీ ఇచ్చినప్పుడే నిషేధం ఎత్తివేస్తామని తేల్చి చెబుతున్నాయి. భారత్​ సైతం ఆ విమానాలను నిషేధించే అవకాశం ఉంది.

బ్రిటన్​, ఫ్రాన్స్​, చైనా, జర్మనీ, నార్వే, మలేషియా, ఒమన్​ సహా అనేక దేశాలు ఇప్పటికే తమ గగనతలం నుంచి బోయింగ్ 737 మ్యాక్స్​ విమానాల​ను నిషేధించాయి.

ప్రయాణికుల భద్రతే ముఖ్యమని, అనుమానాలన్నిటికీ సమాధానం లభించే వరకు అన్ని బోయింగ్​ 737 మ్యాక్స్​ విమానాలను జర్మనీలో నిషేధిస్తున్నట్టు ఆ దేశ రవాణా శాఖ మంత్రి స్పష్టం చేశారు. భద్రతా సమస్యలను దృష్టిలో ఉంచుకొని బోయింగ్​ విమానాలను తమ దేశంలోకి అనుమతించేది లేదని చైనా చెప్పింది. ఇథియోపియా ప్రమాదంలో మరణించిన వారికి బ్రిటన్​ ఏవియేషన్​ సంతాపం తెలిపింది.

గత ఐదు నెలల్లో బోయింగ్​ 737 మ్యాక్స్​ 8 మోడల్​కు చెందిన రెండు విమానాలు ప్రమాదానికి గురయ్యాయి. ఇథియోపియా విమాన​ ప్రమాదంలో 157 మంది మృతిచెందారు. గతేడాది అక్టోబర్​లో ఇండోనేషియాకు చెందిన లయన్​ ఎయిర్​లైన్స్​కు చెందిన​ విమానం కుప్పకూలి 189 మంది మరణించారు.​

భద్రతకే పెద్ద పీట...

విమానాలను నిషేధించడంపై బోయింగ్ స్పందించింది. ప్రయాణికుల భద్రతకే పెద్ద పీట వేస్తామని స్పష్టం చేసింది. నిషేధించిన దేశాలకు బోయింగ్​పై తిరిగి నమ్మకం కలిగించడానికి కృషి చేస్తామని తెలిపింది.