ఉగ్రదాడిలో 53 మంది సైనికులు మృతి

మాలీలో సైనిక శిబిరాలే లక్ష్యంగా జరిగిన ఉగ్రదాడిలో 53 మంది సైనికులు ప్రాణాలు కోల్పోయారు. ఉగ్రవాదుల చర్యలను ఖండించిన ప్రభుత్వం సహాయక చర్యలను ముమ్మరం చేసింది. ఈ తరహా ఘటన జరగడం నెల రోజుల వ్యవధిలో ఇది రెండోసారి.

ఉగ్రదాడితో పశ్చిమాఫ్రికా దేశం మాలీ ఉలిక్కిపడింది. సైనిక స్థావరమే లక్ష్యంగా జరిగిన దాడిలో 53 మంది సైనికులు మృతిచెందారు. ఉగ్ర ఘటనను తీవ్రంగా ఖండించిన మాలీ ప్రభుత్వం.. తమ దేశంలో ఇటీవలి కాలంలో ఇదే అతిపెద్ద ఇస్లాం ఉగ్రవాదుల హింసాకాండ అని పేర్కొంది.

సైనికులతో పాటు ఓ పౌరుడు మృతి చెందినట్టు అధికారులు తెలిపారు. తీవ్రంగా గాయపడిన 10 మందిని ఘటనాస్థలి నుంచి రక్షించినట్టు పేర్కొన్నారు. ప్రస్తుతం పరిస్థితి అదుపులో ఉందని... మృతదేహాల వెలికితీత చర్యలు కొనసాగుతున్నట్టు స్పష్టం చేశారు.

జిహాదీల తిరుగుబాటుతో మాలీ సైన్యం తీవ్ర ఇబ్బందులు ఎదుర్కొంటోంది. నెల రోజుల క్రితం ఇదే తరహా దాడి జరిగింది. బుర్కినా ఫాసో సరిహద్దులో ఇద్దరు జిహాదీలు 40 మంది సైనికులను బలిగొన్నారు.

ఇదీ చూడండి:-గాజా క్షిపణి దాడికి ఇజ్రాయెల్ ప్రతీకారం