గతేడాది ఆఖర్లో ‘అఖండ’తో బాక్సాఫీస్‌ ముందుకొచ్చి.. భారీ వసూళ్లతో సత్తా చాటారు కథానాయకుడు బాలకృష్ణ. కొవిడ్‌ ఉద్ధృతి తర్వాత ప్రేక్షకులు థియేటర్లకు రావట్లేదని సినీ వర్గాలు ఆందోళన చెందుతున్న తరుణంలో ఈ సినిమాతో పరిశ్రమకు కొత్త ఊపిరి ఊదారు బాలయ్య. అయితే ఆయన నుంచి ఈ ఏడాది ఒక్క చిత్రమూ రాలేదు. ‘అఖండ’ విడుదలైన వెంటనే గోపీచంద్‌ మలినేనితో కలిసి ‘వీరసింహారెడ్డి’ని పట్టాలెక్కించినప్పటికీ.. కొవిడ్‌ మూడో దశ ఉద్ధృతి, చిత్రీకరణల బంద్‌ తదితర కారణాల వల్ల చిత్రీకరణ ఆలస్యమైంది. ఇప్పుడీ సినిమాతోనే సంక్రాంతి బరిలో సందడి చేసేందుకు సిద్ధమవుతున్నారు బాలకృష్ణ.
ఆయన బాటలోనే గతేడాది చివర్లో ‘పుష్ప’గా ప్రేక్షకుల ముందుకొచ్చి.. జాతీయ స్థాయిలో మెరుపులు మెరిపించారు కథానాయకుడు అల్లు అర్జున్. దీని తర్వాత ఆయన నుంచీ మరో సినిమా రాలేదు. అయితే దీనికి కారణం లేకపోలేదు. ‘పుష్ప2’ పూర్తయ్యే వరకు మరో సినిమా చేయకూడదని బన్నీ నిర్ణయించుకోవడంతో 2022లో ఆయన ఖాతా తెరవలేదు. నిజానికి దీన్ని ఈ ఏడాదిలోనే ప్రేక్షకుల ముందుకు తీసుకురావాలని తొలుత లక్ష్యం పెట్టుకున్నారు. కానీ, ‘పుష్ప’ తొలి భాగానికి దక్కిన ఆదరణ ‘పుష్ప2’పై అంచనాల్ని భారీగా పెంచేసింది. దీంతో చిత్ర బృందం ఇందుకు తగ్గట్లుగానే కథను భారీ హంగులతో సరికొత్తగా తీర్చిదిద్దుకోవాల్సి వచ్చింది. ఫలితంగానే ఆరంభంలో పట్టాలెక్కాల్సిన ఈ సినిమా.. చివర్లో సెట్స్‌పైకి వచ్చింది. మంగళవారం నుంచే హైదరాబాద్లో కొత్త షెడ్యూల్‌ ప్రారంభమైనట్లు సమాచారం. అన్నీ అనుకున్నట్లు జరిగితే వచ్చే ఏడాది చివర్లో ఈ సినిమాతో మళ్లీ తెరపై మెరవనున్నారు అల్లు అర్జున్.
కథలు కుదరాలే కానీ.. ఏడాది రెండు మూడు చిత్రాలైనా చకచకా చేసేస్తుంటారు కథానాయకుడు సాయిధరమ్‌ తేజ్‌. కెరీర్‌ ఆరంభం నుంచి ఆయన ఇదే రీతిలో జోరు చూపించారు. అయితే గతేడాది ‘రిపబ్లిక్‌’ చిత్ర విడుదలకు ముందు తేజు అనుకోకుండా రోడ్డు ప్రమాదానికి గురవ్వడంతో.. ఆరు నెలలకు పైగా సినిమాలకు దూరంగా ఉండాల్సి వచ్చింది. దీంతో ఆయన ఈ ఏడాది ఒక్క సినిమానీ ప్రేక్షకుల ముందుకు తీసుకురాలేకపోయారు. సాయితేజ్‌ ప్రస్తుతం ‘విరూపాక్ష’తో సందడి చేసేందుకు సిద్ధమవుతున్నారు. కార్తీక్‌ దండు తెరకెక్కిస్తున్న ఈ మిస్టీక్‌ థ్రిల్లర్‌.. వచ్చే ఏడాది ఏప్రిల్‌ 21న థియేటర్లలోకి రానుంది. కెరీర్‌ ఆరంభం నుంచీ ఒకటి తర్వాత ఒకటి అన్నట్లుగా నెమ్మదిగా సినిమాలు చేస్తూ వస్తున్నారు కథానాయకుడు అఖిల్‌ అక్కినేని. ఆయన ఈ పంథాని ఈ ఏడాదీ కొనసాగించారు. ‘మోస్ట్‌ ఎలిజిబుల్‌ బ్యాచ్‌లర్‌’తో గతేడాదికి వీడ్కోలు చెప్పిన ఆయన.. ఈ సంవత్సరం ఒక్క చిత్రం చూపించలేకపోయారు. సురేందర్‌ రెడ్డి దర్శకత్వంలో చేస్తున్న ‘ఏజెంట్‌’తో ఈ ఏడాది ప్రేక్షకుల ముందుకు రావాలని ప్రయత్నించినప్పటికీ.. చిత్రీకరణ ఆలస్యమవడం వల్ల అది సాధ్యపడలేదు. ప్రస్తుతం ముగింపు దశ చిత్రీకరణలో ఉన్న ఈ యాక్షన్‌ థ్రిల్లర్‌.. వచ్చే ఏడాది ప్రథమార్ధంలో ప్రేక్షకుల ముందుకు రానున్నట్లు తెలుస్తోంది.