Shah Rukh Khan Jawan Trailer : బాలీవుడ్ అగ్ర హీరో షారుక్ ఖాన్.. 'పఠాన్'తో బ్లాక్బస్టర్ హిట్ అందుకున్నారు. ప్రస్తుతం ఆయన 'జవాన్' సినిమాతో మరోసారి బాక్సాఫీసును బద్దలుగొట్టడానికి రాబోతున్నారు. త్వరలో ఈ సినిమా ట్రైలర్ను విడుదల చేయనున్నారు. అయితే, ఈ మూవీ ట్రైలర్ను ప్రముఖ హాలీవుడ్ హీరో టామ్ క్రూజ్ నటించిన 'మిషన్ ఇంపాజిబుల్: డెడ్ కమింగ్ పార్ట్ 1'కు జతచేయనున్నారు. జులై 12న ఈ సినిమాతో పాటు.. 'జవాన్' ట్రైలర్ కూడా థియోటర్లలో గ్రాండ్గా రిలీజ్ కానుంది. షారుక్ సినిమా ప్రచార చిత్రాన్ని టామ్ క్రూజ్ చిత్రానికి జత చేయడం వల్ల ఫ్యాన్స్ ఆనందం వ్యక్తం చేస్తున్నారు.
'జవాన్' చిత్రాన్ని ప్రముఖ తమిళ దర్శకుడు అట్లీ తెరకెక్కిస్తున్నారు. యాక్షన్ థ్రిల్లర్గా రూపొందుతున్న ఈ సినిమాలో షారుక్ సరికొత్త లుక్లో కనిపించనున్నట్లు తెలుస్తోంది. యాక్షన్ సన్నివేశాలతో పాటు ఎమోషన్స్తో కూడా ప్రేక్షకులను ఆకట్టుకునేలా ఈ సినిమాను తెరకెక్కిస్తున్నారని సమాచారం. ఇంతకుముందు విడుదల చేసిన టీజర్తో ఈ సినిమాపై భారీ అంచనాలు ఏర్పడ్డాయి. ఈ చిత్రంలో షారుక్తో పాటు తమిళ నటుడు విజయ్ సేతుపతి, నయనతార, బాలీవుడ్ నటి సన్యా మల్హోత్రా కీలక పాత్రలు పోషిస్తున్నారు. షారుక్ సొంత బ్యానర్ రెడ్ చిల్లీస్ ఎంటర్‌టైన్‌మెంట్లో తెరకెక్కుతున్న ఈ మూవీని ఆయన భార్య గౌరీ ఖాన్ నిర్మిస్తున్నారు.
'యానిమల్' ఇంకా ఆలస్యం.. అదే కారణం!
Animal Movie Postponed : సినీ అభిమానులు ఆసక్తిగా ఎదురుచూస్తున్న చిత్రం 'యానిమల్'. 'అర్జున్ రెడ్డి' ఫేమ్ సందీప్ వంగా దర్శకత్వం వహిస్తున్న ఈ సినిమాలో బాలీవుడ్ హీరో రణ్బీర్ కపూర్ నటిస్తున్నారు. తాజాగా ఈ మూవీ విడుదలను వాయిదా వేస్తున్నట్లు డైరెక్టర్ సందీప్ వంగా ప్రకటించారు. దీనికి గల కారణాన్ని, కొత్త విడుదల తేదీని తెలుపుతూ ఆయన వీడియో షేర్ చేశారు. ''ఈ చిత్రం ఐదు భాషల్లో విడుదలవుతుంది. ఇందులో మొత్తం ఏడు పాటలు ఉన్నాయి. ఐదు భాషలకు తగినట్లు వాటిలో మార్పులు చేయాలి. మొత్తం 35 పాటలకు చాలా పని చేయాలి. వాటిని రికార్డ్‌ చేయాలంటే ఇంకా సమయం పడుతుంది. అందువల్లే నిర్మాణాంతర పనులు ఆలస్యం అవుతున్నాయి' అని సందీప్ వంగ అన్నారు.