Shahrukhkhan House Name Plate Trending: బాలీవుడ్ కింగ్‌ఖాన్‌ షారుక్కు మార్కెట్‌లో విపరీతమైన ఫ్యాన్‌ ఫాలోయింగ్‌ ఉన్న సంగతి తెలిసిందే. వెండితెరపై ఆయన్ని చూసేందుకు సుమారు మూడేళ్ల నుంచి అభిమానులు ఆశగా ఎదురుచూస్తున్నారు. దీంతో షారుక్, ఆయన చేస్తున్న సినిమాలకు సంబంధించి ఎలాంటి టాపిక్‌ బయటకు వచ్చినా.. అది వెంటనే సోషల్‌మీడియా ట్రెండింగ్‌లోకి వెళ్లిపోతుంది. కానీ, తాజాగా ఎలాంటి అప్డేట్ లేకపోయినప్పటికీ కేవలం ఒక్క చిన్న విషయంతో ఆయన పేరు సోషల్మీడియాలో దూసుకెళ్లింది. ట్రెండింగ్‌కి కారణమైన విషయమేమిటంటే.. షారుక్ ఇంటి నేమ్‌ ప్లేట్‌ మార్చడం.
ముంబయిలోని అత్యంత ఖరీదైన ప్రాంతంగా చెప్పుకొనే బాంద్రాలో షారుక్ ఖాన్‌కు భవంతి ఉంది. తమ అభిరుచులకు అనుగుణంగా షారుక్, ఆయన సతీమణి గౌరీ ఖాన్ ఈ ఇంటిని డిజైన్‌ చేయించుకున్నారు. ఈ ఇంటికి 'మన్నత్' అని పేరు పెట్టారు. సుమారు రూ.200 కోట్లు విలువచేసే ఈ ఇంటిలో 2001 నుంచి షారుక్ నివాసం ఉంటున్నారు. ఇప్పటివరకూ ఆ ఇంటి నేమ్‌ ప్లేట్‌ను పలుమార్లు మార్చారు. ఈక్రమంలోనే తాజాగా మరోసారి కొత్త డిజైన్‌తో 'మన్నత్' నేమ్‌ ప్లేట్‌ని మార్చారు. ఈ ఫొటోలు నెట్టింట్లో దర్శనమివ్వడంతో వైరల్‌గా మారాయి. అలా, 'షారుక్ ఖాన్', 'మన్నత్' ట్రెండింగ్‌లోకి చేరాయి. అది చూసిన పలువురు నెటిజన్లు.. "ఇదెక్కడి అభిమానమో.." అని కామెంట్లు చేస్తున్నారు.