Rajinikanth Badrinath Visit : తమిళ సూపర్ స్టార్ రజినీకాంత్ ప్రస్తుతం ఆధ్యాత్మికత సేవలో ఉన్నారు. 'జైలర్' సినిమా రిలీజ్కు ముందు హిమాలయాలకు వెళ్లిన ఆయన.. తాజాగా ప్రముఖ పుణ్యక్షేత్రం బద్రీనాథ్ ఆలయాన్ని సందర్శించారు. ఈ సందర్భంగా శ్రీ బద్రీనాథ్-కేదార్‌నాథ్ ఆలయ కమిటీ ఆయనకు ఘన స్వాగతం తెలిపింది. స్వామివారిని దర్శించుకున్న ఆయన అక్కడ జరిగిన స్వర్ణ హారతిలో కూడా పాల్గొన్నారు. అనంతం కమిటీ సభ్యులు రజనీకాంత్ను సత్కరించి తీర్థ ప్రసాదాలను అందజేశారు. ఆ తర్వాత ఆలయ ప్రాంగణంలో సందడి చేసిన ఆయన.. అభిమానులకు అభివాదం చేసి, వారితో కాసేపు మాట్లాడారు. దీనికి సంబంధించిన కొన్ని ఫొటోలు నెట్టింట వైరల్‌గా మారాయి.
Rajinikanth Himalayas Visit : మరోవైపు హిమాలయాల పర్యటనలో భాగంగా రజనీ.. రిషికేష్‌లోని స్వామి దయానంద గురూజీ ఆశ్రమాన్ని శనివారం సందర్శించారు. ఈ సందర్భంగా అక్కడున్న వారితో పలు విషయాలను పంచుకున్నారు. "ఎన్నో అంచనాల మధ్య 'జైలర్' విడుదలైంది. 'కంగారుపడొద్దు. సినిమా తప్పకుండా విజయం అందుకుంటుంది' అని స్వామీజీ నాతో చెప్పారు. ఆయనే స్వయంగా ఆ మాట చెప్పారంటే తప్పకుండా 'జైలర్' హిట్‌ అయినట్టే" అని రజనీ అన్నారు.
Rajinikanth Jailer Cast :ఇక ఈ సినిమా విషయానికి వస్తే.. సూపర్ స్టార్ రజనీకాంత్ లీడ్ రోల్లో తెరకెక్కిన 'జైలర్'ను తమిళ దర్శకుడు నెల్సన్ దిలీప్ కుమార్ రూపొందించారు. యాక్షన్, సెంటిమెంట్,కామెడీ ఇలా అన్ని అంశాలను ఎంతో చక్కగా ఆయన చూపించారు. ఇందులో రజనీ సరసన సీనియర్ హీరోయిన్ రమ్యకృష్ణ మెరవగా.. మిల్క్ బ్యూటీ తమన్న ఓ కీలక పాత్ర పోషించారు. ప్రముఖ నిర్మాణ సంస్ధ సన్ పిక్చర్స్ ఈ సినిమాకు నిర్మాణ బాధ్యతలు చేపట్టింది.