Nagashourya krishna vindra vihari song: యువహీరో నాగశౌర్య నటించిన రొమాంటిక్ ఎంటర్టైన్మెంట్ చిత్రం 'కృష్ణ వ్రింద విహారి'. అనీష్‌ ఆర్.కృష్ణ దర్శకుడు. షిర్లే సెటియా కథా నాయిక. తాజాగా ఈ మూవీలోని 'వర్షంలో వెన్నెల' అనే రొమాంటిక్ సాంగ్ను స్టార్ హీరోయిన్ సమంత రిలీజ్ చేసింది. చిత్రబృందానికి ఆల్ ది బెస్ట్ విషెస్ తెలిపింది. యువతను ఆకట్టుకునేలా ఉన్న ఈ గీతాన్ని.. ఆదిత్య ఆర్కే, సంజన కల్మంజి ఆలపించారు. సంప్రదాయబద్ధమైన కుటుంబంలో పుట్టిన ఓ కుర్రాడు.. ఉద్యోగం కోసమంటూ హైదరాబాద్‌ వెళ్తాడు. ఆ తర్వాత ప్రేమలో పడిన అతని ప్రయాణం ఎన్ని మలుపులు తిరిగిందనేది ఈ చిత్ర కథాంశం. ఇందులో నాగశౌర్య బ్రాహ్మణ యువకుడిగా ఓ కొత్త రకమైన పాత్రలో కనిపించనున్నారు. సీనియర్‌ నటి రాధిక బలమైన పాత్రలో కనిపిస్తారు. వెన్నెల కిషోర్‌, రాహుల్‌ రామకృష్ణ, సత్య, బ్రహ్మాజీ తదితరులు నటిస్తున్న ఈ చిత్రానికి సాయిశ్రీరామ్‌ ఛాయాగ్రహణం అందిస్తున్నారు. మహతి స్వరసాగర్‌ సంగీతం అందించారు. ఐరా క్రియేషన్స్‌ పతాకంపై ఉషా మూల్పూరి ఈ చిత్రాన్ని నిర్మిస్తున్నారు. శంకర్‌ప్రసాద్‌ మూల్పూరి సమర్పకులు.
Pushpa Alluarjun birthday grand party: 'పుష్ప' విజయంతో ఐకాన్‌స్టార్‌ అల్లుఅర్జున్ ఫుల్ జోష్‌లో ఉన్నారు. ఈ సినిమాతో ఆయన క్రేజ్‌ కేవలం భారత్‌కు మాత్రమే కాకుండా విదేశాలకూ పాకింది. ఈ నేపథ్యంలో బన్నీ తన ఫ్రెండ్స్‌కి గ్రాండ్ పార్టీ ఇవ్వాలని నిర్ణయించుకున్నారు. శుక్రవారం 40వ వసంతంలోకి అడుగుపెట్టిన బన్నీ.. స్నేహితులకు విదేశాల్లో ప్రత్యేక పార్టీ ఇచ్చారు. సెర్బియా, బెల్‌గ్రేడ్‌ ప్రాంతంలోని ఓ రెస్టారెంట్‌లో నిర్వహించిన ఈ పార్టీకి కేవలం 50 మందికి మాత్రమే ఆహ్వానం అందింది. స్నేహితుల సమక్షంలో తన సతీమణి స్నేహారెడ్డితో కలిసి బన్నీ కేక్‌ కట్‌ చేశారు. ఈ పార్టీకి సంబంధించిన కొన్ని ఫొటోలు, వీడియోలు నెట్టింట వైరల్‌గా మారాయి. ఇక, సినిమాల విషయానికి వస్తే ఈ టూర్‌ నుంచి వచ్చిన తర్వాత ఆయన తిరిగి సినిమా పనుల్లో బిజీ కానున్నారు. ‘పుష్ప’ విజయం తర్వాత ప్రేక్షకులందరూ ఎంతో ఆసక్తిగా ఎదురుచూస్తోన్న ‘పుష్ప-2’ జూన్‌ లేదా జులైలో పట్టాలెక్కే అవకాశం ఉన్నట్లు వార్తలు వస్తున్నాయి.