పవర్‌స్టార్‌ పవన్‌కల్యాణ్‌, దర్శకుడు సుజిత్ కాంబినేషన్‌లో ఓ సినిమా రానున్నట్లు తాజాగా చత్ర బృందం ప్రకటించింది. ఓ కాన్సెప్ట్‌ పోస్టర్ సైతం విడుదలైంది. అయితే ఈ పోస్టర్ను ఆసక్తిగా తిలకిస్తే ఇందులో సినిమాకు సంబంధించిన పలు విషయాలను దర్శకుడు పొందుపరిచినట్లు అర్థమవుతుంది. ఇప్పుడు పవర్‌స్టార్‌ అభిమానులందరూ ఆ పోస్టర్‌లో దాగి ఉన్న విశేషాలను డీ కోడ్‌ చేసే పనిలో పడ్డారు. ఇంతకీ ఆ పోస్టర్ ఏం చెబుతుందో ఓ లుక్కేద్దాం..
ఆ పోస్టర్ను ఒక్కసారి చెక్‌ చేస్తే..
- They Call Him #OG.. ఇక్కడ ఓజీ అంటే ఒరిజినల్‌ గ్యాంగ్‌స్టర్‌. వాళ్లందరూ ఆయన్ని ఒరిజినల్‌ గ్యాంగ్‌స్టర్‌ అని పిలుస్తుంటారని ఈ ట్యాగ్‌ లైన్‌ చెబుతోంది.
- పోస్టర్‌లో పవన్‌కల్యాణ్‌ ఫొటోపై రాసి ఉన్న భాష.. జపానీస్‌. 'FirestormIsComing' (అగ్నితుపాను వస్తోంది) అని దాని అర్థం.
- పవన్‌కల్యాణ్‌ నీడలో గన్‌ కనిపిస్తుంది.
- పవన్‌కల్యాణ్‌ ముందు ఉన్న వృత్తాకారం.. జపాన్‌ జాతీయ జెండాను గుర్తు చేస్తుంది.
- పోస్టర్‌లో ఓ వైపు విగ్రహం ఆకారం కనిపిస్తుంది. అది జపాన్‌లోనే అత్యంత ఎత్తైన బుద్ధుడి విగ్రహం. ఇది ఆ దేశంలోని ఉషికు ప్రాంతంలో ఉంది.
- ఇక, పోస్టర్‌లో మరోవైపు చూస్తే మనదేశంలోని గేట్‌వే ఆఫ్‌ ఇండియా కనిపిస్తుంది.
పైన చెప్పిన వాటిని ఆధారంగా చూస్తే ఈ సినిమాలో పవర్‌స్టార్‌ గ్యాంగ్‌స్టర్‌ పాత్రలో కనిపించనున్నారని అర్థమవుతోంది. జపాన్‌, ముంబయి నేపథ్యంలో ఈ కథ సాగే అవకాశం ఉందని తెలుస్తోంది. డీవీవీ ఎంటర్‌టైన్‌మెంట్స్‌ పతాకంపై రూపుదిద్దుకోనున్న ఈసినిమా కోసం సుమారు రూ.100 కోట్ల బడ్జెట్‌ వెచ్చించే అవకాశం ఉందని సమాచారం.