Nani 30 Title : తన నేచురల్ యాక్టింగ్తో తెలుగు ప్రేక్షకుల మదిలో మంచి స్థానాన్ని సంపాదించుకున్నారు టాలీవుడ్ స్టార్ హీరో నాని. అప్పట్లో వచ్చిన 'అష్టాచమ్మా' నుంచి ఇటీవల వచ్చిన 'దసరా' సినిమా వరకు అన్నింటిలో తనదైన శైలి నటనతో మంచి గుర్తింపు పొందారు. ఇక ఇండస్ట్రీలో వేగంగా సినిమాలను పట్టాలెక్కించే స్టార్స్లో నాని ఒకరు. సమ్మర్లో 'దసరా' సినిమాతో ఊర మాస్ లుక్లో కనిపించి హిట్ టాక్ అందుకున్న నాని.. గ్యాప్ తీసుకోకుండా మరో సినిమా షూటింగ్లో బిజీ అయిపోయారు. 'నాని 30' అనే వర్కింగ్ టైటిల్తో చిత్రీకరణ జరుపుకుంటోంది ఈ సినిమా. ఎప్పడూ కొత్త దర్శకులను ప్రోత్సహించే నేచురల్ స్టార్.. ఈ సారి కూడా శౌర్యవ్ అనే కొత్త దర్శకుడికి అవకాశం ఇచ్చారు. శౌర్యవ్ తెరకెక్కిస్తున్న ఈ మూవీ ఈ ఏడాది చివరికల్లా ప్రేక్షకుల ముందుకు రానుంది. ఈ చిత్రంలో నాని సరసన 'సీతారామం' బ్యూటీ మృణాల్ ఠాకూర్ నటిస్తోంది.
చిత్రీకరణ చివరి దశలో ఉన్న ఈ సినిమాకు టైటిల్ ఖరారు చేసే పనుల్లో బిజీగా ఉన్నారు మూవీ మేకర్స్. తండ్రి-కుమార్తె మధ్య అనుబంధం నేపథ్యంలో ఈ సినిమా తెరకెక్కనున్నందున..'హలో డాడీ', 'హాయ్ డాడీ', 'డియర్ డాడీ' లాంటి పేర్లను పరిశీలిస్తున్నారట. దాదాపు 'హలో డాడీ' అనే పేరును ఖరారు చేసే ఆలోచనలో ఉన్నారని సమాచారం.