తమిళనాట దశాబ్దాలుగా అన్నాడీఎంకే, డీఎంకే పార్టీల మధ్యే పోటీ. రాష్ట్ర రాజకీయాలపై ద్రవిడ దిగ్గజాలు జయలలిత, కరుణానిధిది చెరగని ముద్ర. వీరిద్దరి అస్తమయం తర్వాత ఆ స్థాయి నాయకులెవరన్నది ప్రశ్నగానే మిగిలింది.
"అమ్మ మమ్మల్ని ముందుకు నడిపించారు. 47 ఏళ్ల ఆమె రాజకీయ జీవితంలో 27 ఏళ్లు అన్నాడీఎంకేను అధికారంలో కూర్చోబెట్టారు."
-ఆర్ఎం బాబు మురుగవేల్, అన్నాడీఎంకే అధికార ప్రతినిధి
"కరుణానిధి మరణం మానసికంగా ఎంతో నష్టం. కానీ ప్రజాస్వామ్య విధులు నిర్వహించటం పార్టీ కార్యకర్తలుగా మా ముందున్న బాధ్యత."
-కేఎస్ రాధాకృష్ణన్, డీఎంకే సీనియర్ నేత
2014 పరిస్థితులకు భిన్నంగా?
గత లోక్సభ ఎన్నికల్లో 39 స్థానాల్లో 37 గెలుచుకుంది అన్నాడీఎంకే. భాజపా, పీఎంకే చెరొకటి గెలిచాయి. ఈ పార్టీలన్నీ ఎన్డీఏ భాగస్వాములే. డీఎంకే సహా యూపీఏలో ఏ పార్టీ ఒక్క సీటైనా గెలుచుకోలేక చతికిలబడ్డాయి.
ఇప్పుడు తిరిగి పుంజుకునేందుకు స్టాలిన్ సేనకు ఒకేసారి 2 అవకాశాలు వచ్చాయి. ఏప్రిల్ 18న లోక్సభతో పాటు 18 శాసనసభ స్థానాలకు ఉపఎన్నికలు జరగున్నాయి. వీటిని కైవసం చేసుకోగలిగితే డీఎంకేకు చెన్నై పీఠం దక్కడం ఖాయమే. ఈ ఎన్నికల ఫలితాలు 2021 అసెంబ్లీ సమరానికి ముందు ప్రధాన పార్టీలకు అగ్నిపరీక్షే.
జయలలిత, కరుణానిధి లేకుండా జరుగుతున్న మొదటి సార్వత్రిక ఎన్నికల్లో ఆ స్థాయి వ్యూహాలు, ప్రచారం ఎక్కడా కనిపించటం లేదు. అయినా... విజయంపై ధీమాగా ఉన్నాయి రెండు ప్రధాన పార్టీలు.
"అమ్మ మరణంతో పార్టీలో శూన్యం ఆవరించింది. ఇదొక భావోద్వేగ సమయం. అమ్మ కలల సాధనే లక్ష్యంగా పళనిస్వామి, పన్నీర్సెల్వం పార్టీని ముందుకు నడిపిస్తారు."
-ఆర్ఎం బాబు మురుగవేల్, అన్నాడీఎంకే అధికార ప్రతినిధి
"కరుణానిధి మనముందు లేకపోవచ్చు. కానీ ఆయన ఆశయ సాధనకు కట్టుబడి ఉన్నాం. అన్ని మార్గాలను నిర్మించి వెళ్లారు. మేం వాటిని మరింత ముందుకు తీసుకుపోతాం."
-కేఎస్ రాధాకృష్ణన్, డీఎంకే సీనియర్ నేత
భారీ విజయం సాధించి 'అమ్మ'కు అంకితమివ్వాలని పన్నీర్సెల్వం, పళనిస్వామి భీష్మించారు. కలైంజ్ఞర్ వారసత్వాన్ని నిలబెట్టాలని స్టాలిన్ కంకణం కట్టుకున్నారు. అయినా కరుణానిధి, జయలలిత లేని లోటు ఆ పార్టీలపై తప్పకుండా పడుతుందన్నది రాజకీయ విశ్లేషకుల మాట.
"ఆ ఇద్దరు నేతలకు కొందరి ఓట్లు అంకితం. వారి మద్దతు ఓట్లు వారికే ఉంటాయి. కారణాలేమున్నా ఆ పరిస్థితిలో మార్పు వచ్చేది కాదు. ఇప్పుడు వారిద్దరూ లేనందున ఆ సంఖ్య తప్పకుండా తగ్గుతుంది."
-శ్యాం షణ్ముగం, రాజకీయ విశ్లేషకుడు
కొత్త లెక్కలు
అమ్మ మక్కల్ మున్నేట్ర కళగం-ఏఎంఎంకే, మక్కల్ నీది మయ్యమ్-ఎంఎన్ఎం... తమిళనాట కొత్త పార్టీలు. ఏఎంఎంకే అధినేత టీటీవీ దినకరన్. ఎంఎన్ఎం కమల్ హాసన్ది. జయ, కరుణ మరణాంతరం మారిన రాజకీయ సమీకరణాల మధ్య ఈ రెండు కొత్త పార్టీలు ఏమేరకు ప్రభావం చూపగలవన్నది ఆసక్తికరం.
దిగ్గజాలు లేని పోరులో విజేత ఎవరో, తమిళ రాజకీయం ఇంకెలాంటి మలుపు తిరుగుతుందో మే 23న తేలనుంది.
ఇవీ చూడండి:
