Cyber Crime in hyderabad: ఎల్బీ నగర్‌ ప్రాంతానికి చెందిన ఓ యువతిని సామాజిక మాధ్యమాల్లో వచ్చిన ప్రకటన ఆకర్షించింది. ప్రముఖ సంస్థకు చెందిన చీర రూ.వెయ్యికే అందిస్తున్నామన్నది దాని సారాంశం. వస్తువు అందాకే డబ్బు చెల్లించే (సీవోడీ) వెసులుబాటు ఉండడంతో ఆమె చీర కొనుగోలుకు ఆర్డర్ ఇచ్చింది. మూడు రోజుల తర్వాత పార్సిల్‌లో చీర వచ్చింది. డబ్బు చెల్లించి పార్సిల్‌ తెరిచి చూస్తే చీర అక్కడక్కడా చిరిగిపోయి ఉంది.
ఏదైనా సమస్య ఉంటే ఫలానా కాల్‌సెంటర్‌కు ఫోన్‌ చేయమని బిల్లులో ఉంది. చీర బాగోలేదని చెప్పేందుకు విద్యార్థిని ఆ నంబరుకు ఫోన్‌ చేసింది. లైన్లోకి వచ్చిన కాల్‌సెంటర్‌ ఉద్యోగులు ఓ లింకు పంపారు. దాన్ని తెరిచి, బ్యాంకు ఖాతా వివరాలు నమోదు చేస్తే వెంటనే డబ్బు జమ చేస్తామన్నారు. ఆమె వాళ్లు చెప్పినట్లే చేసేసరికి ఓ పాస్‌వర్డ్‌ వచ్చింది. దాన్ని కూడా నింపింది. కొద్దిసేపటి తర్వాత డబ్బు పడిందో, లేదో తెలుసుకునేందుకు ఆన్‌లైన్‌ బ్యాంకింగ్‌ ద్వారా పరిశీలించి విస్తుపోయింది. ఖాతాలో ఉన్న సొమ్మంతా పోవడంతో ఆమె పోలీస్‌స్టేషన్‌కు పరుగులు పెట్టింది.
లింకు నొక్కితే అంతే..
తక్కువ ధరలకే వస్తువులిస్తామని సామాజిక మాధ్యమాల్లో వచ్చే ప్రకటనలకు ఇలాగే చాలామంది బోల్తా పడి ఆర్డర్ ఇస్తున్నారు. సైబర్ దొంగలు ఉద్దేశపూర్వకంగానే పాడైన వస్తువులను పంపుతున్నారు. వాటి కోసం ఫోన్‌ చేస్తే.. లింకులు పంపి బాధితుల ఫోన్లను తమ అధీనంలోకి తీసుకుంటున్నారు. తర్వాత వారి బ్యాంకు ఖాతాల్లోకి చొరబడి, ఫోన్‌ నంబర్లను మార్చేసి తమ ఫోన్‌ నంబర్లు పెట్టుకుంటున్నారు.
ఖాతాల్లోని డబ్బంతా కొల్లగొడుతున్నారు. నంబరు మారిపోతుంది కనుక.. వినియోగదారు ఫోన్‌కు బ్యాంకు నుంచి ఓటీపీ కానీ, డబ్బు తీసినట్లు మెసేజ్‌ కానీ రావు. పైగా ఫోన్లో ఉన్న సమస్త సమాచారం సైబర్ దొంగలకు చేరిపోతుంది. ముఖ్యంగా వ్యక్తిగత ఫొటోలు, వీడియోల వంటి వాటితో వారు భవిష్యత్తులో బెదిరించే అవకాశం ఉంది.