Chain Snatching: పొలం పనులకు వెళుతున్న వృద్ధురాలి మెడలో పుస్తెలతాడును దొంగిలించి పారిపోతున్న దుండగులను పట్టుకొని దేహశుద్ధి చేసిన ఘటన నాగర్‌కర్నూల్ జిల్లాలో చోటుచేసుకుంది. కోడెర్ మండలం తీగలపల్లి గ్రామానికి చెందిన ఎల్లమ్మ, సుల్తానమ్మ పనుల కోసం పొలం దగ్గరకు వెళుతున్నారు. మార్గమధ్యలో ఇద్దరు గుర్తుతెలియని వ్యక్తులు వీరిని అడ్డగించి కత్తులతో బెదిరించారు. ఎల్లమ్మ మెడలో ఉన్న పుస్తెలతాడును లాక్కొని బైక్‌పై పారిపోయేందుకు యత్నించారు. వృద్ధురాలి కేకలు వేయగా అటునుంచి వెళ్తున్న యాదగిరి... దుండగులను గమనించాడు. వారిని ఆపేందుకు యత్నించగా... కత్తితో దాడి చేసేందుకు యత్నించగా... యాదగిరి వారి బైక్‌ను కాలితో తన్నాడు.
వెంటనే చుట్టు పక్కల పనిచేస్తున్న రైతులు అక్కడికి చేరుకుని దుండగులను చితకబాదారు. ఇద్దరు దొంగలు విడిపించుకునే క్రమంలో రైతు గంగయ్యపై రాయితో దాడి చేయగా... గాయాలయ్యాయి. కోపోద్రిక్తులైన రైతులు... నిందితులను చితకబాదడం వల్ల ఇద్దరు తీవ్రంగా గాయపడ్డారు. పోలీసులు ఘటనా స్థలానికి చేరుకొని గాయపడిన ముగ్గురిని జిల్లా ఆస్పతికి తరలించారు. కేసు నమోదు చేసుకుని దర్యాప్తు చేస్తున్నారు.