student Cheated womens: జోగాడ వంశీకృష్ణ, హర్ష, హర్షవర్దన్‌ తదితర మారుపేర్లతో తిరుగుతుంటాడు. ఏపీలోని తూర్పు గోదావరిజిల్లా, రామచంద్రరావుపేట సొంతూరు. రాజమహేంద్రవరంలోని బీటెక్‌ పూర్తిచేసి 2014లో ఉద్యోగ వెతుకులాటలో హైదరాబాద్‌ చేరాడు. రెండేళ్లు కూకట్‌పల్లి వైబ్స్‌ హోటల్‌లో పనిచేశాడు. స్నేహితులతో క్రికెట్, గుర్రపు పందేలు ఆడేవాడు. ఆరేళ్ల క్రితం ట్రావెల్‌-కన్సల్టెన్సీ కార్యాలయంలో ఉద్యోగిగా చేరాడు. అక్కడకు వచ్చిన వారికి ఉద్యోగాలు ఇప్పిస్తానంటూ పెద్దఎత్తున డబ్బు వసూలు చేశాడు. బాధితుల ఫిర్యాదుతో కూకట్‌పల్లి పోలీసులు అరెస్ట్ చేశారు.
గాయ‌త్రి, మాధురి, సాత్విక, శ్వేత ఇలా చాలా మంది యువతుల పేర్లతో ఇన్‌స్టాగ్రామ్‌లో నకిలీ ఖాతాలు తెరిచాడు. వాటి ద్వారా మహిళలు, యువతులు, బాలికలకు తనను యువతిగా పరిచయం చేసుకొనేవాడు. హర్ష అలియాస్‌ హర్షవర్దన్‌ సంపన్నుడని, సేవా కార్యక్రమాలు, ఉపాధి అవకాశాలు కల్పిస్తాడంటూ అమ్మాయిలే లక్ష్యంగా నకిలీ ఖాతాల నుంచి తన ఫోన్‌ నంబర్లు పంపేవాడు. ఫోన్‌ చేసిన అమ్మాయిలతో తానే హర్ష నంటూ పరిచయం చేసుకునేవాడు. యాప్‌ సహాయంతో గొంతు మార్చి అమ్మాయిగా మాట్లాడేవాడు. కొన్నిసార్లు వాట్సాప్‌ ద్వారా మాట్లాడటం, సందేశాలు పంపేవాడు. యానాం ఎమ్మెల్యే శ్రీనివాస్‌ అశోక్‌ను తానేనంటూ ఆయన ఫొటోతో ఇన్‌స్టా ఖాతా సృష్టించి అందమైన అమ్మాయిలకు వల విసిరాడు. తానే శాసనసభ్యుడినంటూ అవతలి వారితో ఛాటింగ్‌ చేసేవాడు.
ముందు.. యువతుల బ్యాంకు ఖాతాల్లో లక్ష రూపాయలు జమచేసేవాడు. ఒక్కసారిగా పెద్దఎత్తున డబ్బు రావటంతో వారిలో మరింత నమ్మకం పెరిగేది. దీన్ని అవకాశం చేసుకొని తన బ్యాంకు ఖాతాలు నిలిపివేశారని, అత్యవసరంగా డబ్బు కావాలంటూ మహిళల నుంచి క్రికెట్ బుకీలు, గుర్రపు పందేల నిర్వాహకుల బ్యాంకు ఖాతాల్లోకి జమచేయించేవాడు. ఆన్‌లైన్‌ వివాహ పరిచయ వేదికల్లో వితంతువులు సహా విడాకులు పొందిన మహిళలను ఎంపిక చేసుకొని పెళ్లి చేసుకుంటానంటూ వారి నుంచి కూడా భారీగా డబ్బు వసూలు చేశాడు. 2016 నుంచి ఇప్పటి వరకు వెయ్యి మందికి పైగా యువతులు, మహిళలు ఇతడి చేతిలో మోసపోయినట్టు తెలుస్తోంది. బాధితుల్లో కేవలం 50-60 మంది మాత్రమే ధైర్యంగా పోలీసులకు ఫిర్యాదు చేశారు.