జోగులాంబ గద్వాల జిల్లా అలంపూర్‌ మండలం ఉట్కూరు గ్రామానికి చెందిన ఓ చిన్నారి రక్షణ కల్పించాలంటూ పోలీసులను ఆశ్రయించింది. తమ గ్రామానికే చెందిన లక్ష్మన్న, బీసన్న.. పొలం కాజేసేందుకు తనను చంపాలని చూస్తున్నారని సుహానా బేగం.. పోలీసులకు ఫిర్యాదు చేసింది.
సుహానా బేగం.. బుక్కాపురంలోని ఉన్నత పాఠశాలలో ఆరో తరగతి చదువుతోంది. ఏడేళ్ల క్రితమే తను తల్లిదండ్రులను అనారోగ్యంతో మరణించారు. సోదరి ఆస్మాతో కలిసి నాయనమ్మతో ఉంటోంది. గతేడాది అక్క ఆస్మా అనారోగ్యంతో మృతి చెందింది. తండ్రి మరణానంతరం బాలిక పేరుతో ఉన్న రెండెకరాల పొలం కొట్టేసేందుకు లక్ష్మన్న, బీసన్న అనే ఇద్దరు ప్రయత్నిస్తున్నారని సుహానా తెలిపింది. కుటుంబ సభ్యులతో కలిసి స్థానిక పోలీసులకు ఫిర్యాదు చేసింది. తనను కూడా చంపేసి పొలం లాక్కునేందుకు లక్ష్మన్న చూస్తున్నాడని చిన్నారి వాపోయింది. బుక్కాపురంలోని ఉన్నత పాఠశాలకు వెళ్తుండగా చంపుతామని బెదిరిస్తున్నారని చిన్నారి నాయనమ్మ, బంధువులు ఆరోపించారు.
మా నాన్న చనిపోవడంతో ఆయన పేరు మీద ఉన్న పొలం నాకు వారసత్వంగా వచ్చింది. ఈ భూమిని లాక్కునేందుకు మా ఊళ్లోనే ఉండే లక్ష్మన్న, బీసన్న యత్నిస్తున్నారు. నన్ను చంపాలని కూడా ప్రయత్నించారు. వారిపై ఫిర్యాదు చేస్తే పోలీసులు పట్టించుకోలేదు. నాకు రక్షణ కల్పించాలి. -సుహానా బేగం, బాధిత చిన్నారి