రాష్ట్రంలో మరో నాలుగు పాలసీలు.. కేబినెట్​లో చర్చ

పెట్టుబడులను ఆకర్షించడంతో పాటు వ్యవసాయ ఉత్పత్తులకు అదనపు విలువ జోడించడం ద్వారా లబ్ధి, ప్రజలకు నాణ్యమైన ఆహార ఉత్పత్తులే ధ్యేయంగా రాష్ట్ర ప్రభుత్వం మరో నాలుగు కొత్త విధానాలను అమలు చేయనుంది. టీఎస్ ఐపాస్​కు అనుబంధంగా ఫుడ్ ప్రాసెసింగ్, ఎలక్ట్రిక్ వాహనాలు, రిటైల్ వర్తకం, లాజిస్టిక్ పాలసీలను సర్కార్ సిద్ధం చేసింది. ఇవాళ్టి కేబినెట్ భేటీలో వీటికి ఆమోదం తెలిపే అవకాశం ఉంది.

సాగునీటి వసతి, 24 గంటల ఉచిత విద్యుత్ సహా వ్యవసాయ రంగంపై ప్రభుత్వ ప్రత్యేక దృష్టితో రాష్ట్రంలో సాగు విస్తీర్ణం గణనీయంగా పెరుగుతోంది. యాసంగిలో రాష్ట్రం నుంచి ఎఫ్​సీఐ భారీగా ధాన్యాన్ని సేకరించింది. వరి సహా అన్ని పంటల విస్తీర్ణం... పంటల దిగుబడి పెరుగుతోంది. పెరిగిన సాగు విస్తీర్ణం, దిగుబడి అనుగుణంగా రైతుల పంటలకు మెరుగైన ధర లభించేలా రాష్ట్ర ప్రభుత్వం ఫుడ్ ప్రాసెసింగ్ పరిశ్రమలను పెద్దఎత్తున ప్రోత్సహించాలని నిర్ణయించింది. ఇందుకోసం ప్రత్యేకంగా సెజ్​లను కూడా ఏర్పాటు చేయనున్నారు. ఆయా ప్రాంతాల్లో పండే పంటలను దృష్టిలో ఉంచుకొని సెజ్​లకు అవసరమైన భూములు కేటాయించనున్నారు.

సెజ్​ల ఏర్పాటు

ఫుడ్ ప్రాసెసింగ్ సెజ్​ల కోసం అవసరమైన భూమిని జిల్లాల్లో ఇప్పటికే గుర్తించారు. టీఎస్ఐఐసీ బృందాలు ఆ భూములను ఇప్పటికే ఓ దఫా పరిశీలించాయి. ఫుడ్ ప్రాసెసింగ్ సెజ్​ల ఏర్పాటు ద్వారా రైతులు పండించే పంటలకు మెరుగైన ధర వచ్చేలా చూడడంతో పాటు ప్రజలకు కల్తీలేని నాణ్యమైన ఆహార ఉత్పత్తులను అందించడం ప్రభుత్వ ఉద్దేశం. రాష్ట్రంలో పెట్టుబడులు పెట్టి పరిశ్రమలు ఏర్పాటు చేసే వారి కోసం తీసుకొచ్చిన టీఎస్ ఐపాస్ విధానానికి మంచి స్పందన ఉంది. టీఎస్ ఐపాస్​కు అనుబంధంగా ఫుడ్ ప్రాసెసింగ్ విధానానికి ప్రభుత్వం రూపకల్పన చేసింది. అదే తరహాలో 2030 నాటికి రాష్ట్రంలో ఎలక్ట్రిక్ వాహనాలను పెద్ద ఎత్తున ప్రోత్సహించాలని ప్రభుత్వం నిర్ణయించింది.

నాలుగు విధానాలు

ఎలక్ట్రిక్ వాహనాల తయారీదారులకు ప్రోత్సాహాకాలతో పాటు వాహనాల ఛార్జింగ్ కోసం అవసరమైన చర్యలు చేపట్టనున్నారు. ఇప్పటికే హైదరాబాద్​లో కొన్ని ఎలక్ట్రిక్ బస్సులను అందుబాటులోకి తీసుకురావడంతో పాటు ఈ వాహనాలను ప్రోత్సహించే దిశగా చర్యలను చేపట్టింది. తయారీని ప్రోత్సహించడం సహా అవసరమైన చర్యల కోసం ప్రత్యేక విధానాన్ని ప్రభుత్వం సిద్ధం చేసింది. ఇదే తరహాలో రిటైల్ ట్రేడ్, లాజిస్టిక్ పాలసీలను కూడా రాష్ట్ర ప్రభుత్వం రూపొందించింది. టీఎస్ ఐపాస్​కు అనుబంధంగా ఈ నాలుగు విధానాలను పరిశ్రమల శాఖ సిద్ధం చేసింది. నాలుగు పాలసీలను ఇవాళ్టి మంత్రివర్గ సమావేశంలో చర్చించి ఆమోదం తెలిపే అవకాశం ఉంది.

ఇదీ చదవండి:రాష్ట్ర కేబినెట్ భేటీ.. చర్చించే అంశాలివే!