శంషాబాద్ కిడ్నాప్ కథ సుఖాంతం

నాలుగు రోజుల క్రితం కిడ్నాప్​కు గురైన బాలున్ని పోలీసులు రక్షించారు. చాకచక్యంగా వ్యవహరించి ఆరుగురు నిందితులను పట్టుకున్నారు. బాబును తల్లిదండ్రులకు అప్పగించారు. నాలుగు రోజులుగా కనిపించకుండా పోయిన తన బిడ్డ తిరిగి రావడం వల్ల తల్లిదండ్రుల అనందానికి అవధులు లేకుండా పోయాయి. సీసీటీవీ ఫుటేజ్ అధారంగా కేసును ఛేదించిన సిబ్బందికి శంషాబాద్​ డీసీపీ ప్రకాశ్​ రెడ్డి రివార్డు అందించారు.

నల్గొండ జిల్లా దేవరకొండకు చెందిన నగేశ్​, తేజ దంపతులకు పిల్లలు లేరు. ఆ విషయం హైదరాబాద్​లో ఉంటున్న తమ బంధువు కొండ లలితతో చెప్పారు. డబ్బులు ఇస్తే ఓ బాబును ఇప్పిస్తానని చెప్పింది లలిత. పని మీద శంషాబాద్ వచ్చిన లలిత.. కల్యాణ్ అనే వ్యక్తిని పరిచయం చేసుకుని తమకు ఓ పిల్లాడు కావాలని చెప్పింది.

కిడ్నాప్​

ఈ నెల 6న శంషాబాద్ తహసీల్దార్​ కార్యాలయం వద్ద తనకు పరిచయమున్న వెంకటమ్మ అనే మహిళ కొడుకును కల్యాణ్ కిడ్నాప్ చేశాడు. బిడ్డ కనబడడం లేదంటూ వెంకటమ్మ ఆర్జీఐఏ పోలీసులకు ఫిర్యాదు చేసింది. కేసు నమోదు చేసుకున్న పోలీసులు సీసీ ఫుటేజ్​ ఆధారంగా నిందితులు గొర్రెల కల్యాణ్, సారంగి రాజు, సారంగి వసంత, కొండ లలిత, కొండ నగేశ్​, కొండ తేజను అరెస్ట్​ చేశారు.

తల్లిదండ్రులకు అప్పగింత

బాబును క్షేమంగా తల్లిదండ్రుల చెంతకు చేర్చారు. తమ బిడ్డను చూసిన తల్లిదండ్రులు సంతోషం వ్యక్తం చేశారు. పిల్లాన్ని రక్షించినందుకు పోలీసులకు కృతజ్ఞతలు తెలిపారు. కేసును ఛేదించిన ఎస్సై, కానిస్టేబుళ్లకు శంషాబాద్​ డీసీపీ ప్రకాశ్​ రెడ్డి రివార్డులు అందజేశారు.

ఇదీ చూడండి : శ్రీశైలంలో జలదృశ్యం- 10 గేట్ల నుంచి ప్రవాహం