'మానవ అక్రమ రవాణా నిరోధానికి ప్రత్యేక బృందం'

మానవ అక్రమ రవాణాను అరికట్టడానికి రాచకొండ పోలీసులు ప్రత్యేక చర్యలు చేపడుతున్నారు. అలాంటి వారిపై నిఘా కోసం ప్రత్యేక బృందాన్ని ఏర్పాటు చేశారు. రాచకొండ కమిషనరేట్ పరిధిలోని అన్ని పోలీస్‌స్టేషన్లను సమన్వయం చేసుకుంటూ.. ఆగడాలను నిరోధించడమే లక్ష్యంగా ప్రత్యేక బృందం పనిచేయనుంది. మానవ అక్రమ రవాణా నియంత్రణలో తనదైన ముద్రవేసిన పోలీస్‌ కమిషనర్‌ మహేశ్‌ భగవత్‌ మరింత కట్టడి చర్యలకు శ్రీకారం చుట్టారు.

ప్రపంచ మానవ అక్రమ రవాణా వ్యతిరేక దినోత్సవం సందర్భంగా గురువారం రాచకొండ పోలీసులు కొత్తకార్యక్రమానికి శ్రీకారం చుట్టారు. ఆ దుశ్చర్యను నిరోధించడమే లక్ష్యంగా పనిచేసేలా ప్రత్యేక బృందాన్ని ఏర్పాటు చేశారు. మహిళలను వ్యభిచార కూపంలోకి లాగేందుకు.. ఇంటి పనులు, యాచన, బలవంతపు పెళ్లిళ్లు చేసేందుకు చిన్నారులను అక్రమంగా తరలిస్తున్నారు. మానవ అవయవాల కోసం అక్రమ రవాణా చేస్తున్న ఘటనలు చోటుచేసుకుంటున్నాయి. ఆ అక్రమాలను నిరోధానికి రాచకొండ పోలీసులు కృషి చేస్తున్నారు. రాచకొండ కమిషనర్ క్యాంప్‌ కార్యాలయ ఆవరణలో ప్రత్యేక కార్యాలయాన్ని ఏర్పాటు చేశారు. ఈ బృందంలో సీఐ నేతృత్వంలో మహిళా కానిస్టేబుళ్లు ఉంటారు..

150 బిలియన్ డాలర్ల చీకటి వ్యాపారం..

మానవ అక్రమ రవాణా ప్రపంచాన్ని పట్టి పీడిస్తున్న సమస్య. అంతర్జాతీయంగా 150 బిలియన్ డాలర్ల చీకటి వ్యాపారం జరుగుతోందని నివేదికలు చెబుతున్నాయి. మహిళలను వ్యభిచార వృత్తిలోకి దింపి చేసే వ్యాపారమే 99 బిలియన్ డాలర్ల వరకు ఉంది. మానవ అక్రమ రవాణా కేసులను మానవీయ కోణంలో చూడాలని పోలీస్‌శాఖ భావిస్తోంది. వ్యభిచారం కేసులో పట్టుబడిన మహిళల పునరావాసానికి స్వచ్ఛంద సంస్థల సహకారం తీసుకుంటున్నారు.

2,146 మంది చిన్నారులను రక్షించి..

కొన్నినెలల క్రితం యాదాద్రి భువనగిరి జిల్లాలో వ్యభిచార ముఠా గుట్టురట్టు చేసి 34 మంది బాలికలను కాపాడారు. 12మంది యువతులను స్వచ్ఛంద సంస్థలో ఆశ్రయం కల్పించారు. 2016 నుంచి రాచకొండ పరిధిలో 290 కేసులు నమోదు చేసి.. 557 మందిని అరెస్ట్ చేశారు. 550 మంది బాధితులను కాపాడారు. 144 వ్యభిచార గృహాలను మూసేసి 50 మంది నిర్వాహకులపై పీడీ చట్టం కింద కేసులు నమోదు చేశారు. ఆపరేషన్ స్మైల్, ముస్కాన్‌లో 2,146 మంది చిన్నారులను రక్షించి 80శాతానికి పైగా పిల్లలను తల్లిదండ్రులకు అప్పగించారు.

మానవ అక్రమ రవాణాకు సంబంధించి ఎలాంటి సమాచారమున్నా 94910-39109 లేదా డయల్ 100కు ఫోన్ చేసి చెప్పాలని రాచకొండ పోలీసులు విజ్ఞప్తి చేశారు.

ఇవీ చూడండి: 'రైతును లారీతో గుద్ది చంపిన ఇసుక మాఫియా'