ఎస్​ఐపై హత్యాయత్నం... స్పష్టంగా సీసీటీవీ దృశ్యాలు

సోమవారం తెల్లవారుజామున దుండిగల్​లో ఎస్​ఐపై దాడి ఘటనలో పోలీసులు దర్యాప్తు వేగవంతం చేశారు. దాడి సమయంలో ఆ ప్రాంతంలో రికార్డ్ అయిన సీసీ టీవీ దృశ్యాలను సంపాదించారు.

రాజధాని శివారు దుండిగల్​లో ఎస్​ఐపై దోపిడీ దొంగల దాడి యత్నం ఘటనను పోలీస్ శాఖ సీరియస్​గా తీసుకుంది. దొంగల పక్కా ప్రణాళిక ప్రకారమే కారును దొంగిలించి.. చోరీకి వచ్చారని గుర్తించారు. చోరీకి యత్నంచిన దృశ్యాలు, అదే సమయంలో వచ్చిన ఎస్​ఐ శేఖర్​ రెడ్డిపై దాడికి యత్నంచిన దృశ్యాలను పరిశీలిస్తున్నారు. ఈ ఫుటేజ్​లో దొంగలు ఎస్​ఐపై కారు దూకించిన దృశ్యాలతో పాటు నిందితుల చిత్రాలు కనిపిస్తున్నాయి.

దొంగిలించిన కారులో చోరీ..!

సీసీటీవీ దృశ్యాల్లో వారు చోరీకి వచ్చిన విషయం స్పష్టంగా కనిపిస్తోంది. కారు చోరీ చేసిన దొంగలు.. అదే కారుతో తమను అడ్డుకున్న ఎస్​ఐను గుద్ది చంపేందుకు యత్నించారు. కారును స్వాధీనం చేసుకున్న పోలీసులు... యజమానిని విచారించారు. వాహనాన్ని ఎవరో దొంగిలించారని, పోలీసులకు ఫిర్యాదు చేశానని చెప్పారు.

అంతరాష్ట్ర ముఠాగా అనుమానం...!

రాత్రి పేట్ బషీర్​బాద్ సమీపంలో నగల దుకాణంలో చోరీకి వచ్చి అదనుకోసం ఎదురుచూస్తుండగా.. గస్తీ పోలీసులు గమనించారు. వారి కారును ఆపేందుకు ప్రయత్నించగా...ఎస్​ఐపైకి కారు దూకించి పరారయ్యారు. సోమవారం తెల్లపారుజామున పేట్​బషీరాబాద్​ పీఎస్​ పరిధిలో ఈ ఘటన చోటు చేసుకుంది. త్రుటిలో ప్రమాదం నుంచి తప్పించుకున్న ఎస్​ఐ వెంటనే గస్తీ వాహనంలో దొంగల కారును వెంబడించారు. దూలపల్లి అటవీ ప్రాంతంలో దొంగలు తమ కారు వేగాన్ని నియత్రించలేక రోడ్డు పక్కన ఉన్న చెట్టును ఢీకొట్టి పరారయ్యారు. నిందితులు అంతరాష్ట్ర ముఠా వారిగా పోలీసులు అనుమానిస్తున్నారు.

ఇవీ చూడండి: చోరీ ఆపేందుకు యత్నించిన ఎస్సై పైకి దూసుకెళ్లిన కారు