ముఖ్యమంత్రి కేసీఆర్ ఆదేశాల మేరకు రైతుబంధు నిధులు రైతుల ఖాతాల్లోకి జమ చేస్తున్నట్లు రాష్ట్ర వ్యవసాయశాఖ మంత్రి సింగిరెడ్డి నిరంజన్ రెడ్డి వెల్లడించారు. రికార్డు సమయంలో ఒకే రోజు 50.84లక్షల మంది రైతులకు రూ.5294.53 కోట్లు ఖాతాలలో జమ చేసినట్లు మంత్రి స్పష్టం చేశారు. ఇవాళ ఉదయం 10 గంటల నుంచి గంటకు లక్షల మంది రైతుల ఖాతాల్లోకి రైతుబంధు నిధులు వేసినట్లు మంత్రి విడుదల చేసిన ప్రకటనలో పేర్కొన్నారు.
కరోనా విపత్తులోనూ అందించాం
ఆర్‌ఓఎఫ్‌ఆర్ (ఏజెన్సీ) పట్టాదారులకు చెందిన 63,477 మంది రైతులకు సంబంధించిన రూ.82.37 కోట్లు ఖాతాల్లో జమ చేశాం. ఈ నెల జూన్ 16 వరకు పాస్ బుక్‌లు వచ్చిన ప్రతి ఒక్కరికీ రైతుబంధు వర్తిస్తుంది. ఇంకా బ్యాంకు వివరాలు ఇవ్వని 5 లక్షల మంది రైతులు ఉన్నారు. ఏఈఓలకు వివరాలు అందగానే ఖాతాలలో నిధులు జమచేయాలని అధికారులను ఆదేశించాం. కరోనా విపత్తులోనూ రైతులకు రైతుబంధు నిధులు అందిస్తున్నాం.