ఏపీలో తగ్గిన 33 శాతం మద్యం దుకాణాలు... ఇకపై ఒక్కరికి 3 సీసాలే

ఏపీలో మద్యం దుకాణాల సంఖ్యను తగ్గించేందుకు ప్రభుత్వం ఉత్తర్వులు జారీచేసింది. ఏపీ బెవరేజెస్ కార్పొరేషన్ నిర్వహిస్తున్న మద్యం దుకాణాలను మరో 13 శాతం తగ్గిస్తూ తాజా ఉత్తర్వులు ఇచ్చింది. ఈ నెల చివరినాటికి మద్యం దుకాణాలు 4,380 నుంచి 2,934 తగ్గిస్తున్నట్లు ప్రకటించింది.

ఏపీలో మద్యం దుకాణాల సంఖ్యను ప్రభుత్వం కుదించింది. ఈ మేరకు ఉత్తర్వులు జారీ చేసింది. ఈ కుదింపుతో మొత్తం 33 శాతం మేర దుకాణాలను ఇప్పటి వరకూ తగ్గించినట్టైందని ప్రభుత్వం స్పష్టంచేసింది. మద్యపానాన్ని నిరుత్సాహపరచటమే లక్ష్యమని ప్రభుత్వం పేర్కొంది. అదనపు ఎక్సైజ్ రిటైల్ టాక్స్ పేరిట మద్యం ధరలు పెంచి కొనుగోళ్లను నిరుత్సాహ పరిచేందుకు కార్యాచరణ చేపట్టినట్టు వెల్లడించింది.

సుమారు 43వేల బెల్టు షాపుల తొలగింపు !

ఇప్పటికే రాష్ట్రవ్యాప్తంగా సుమారు 43 వేల బెల్టు షాపులు తొలగించామని ప్రభుత్వం స్పష్టంచేసింది. ఇందులో భాగంగా ప్రతి వ్యక్తికి బీర్లు, మద్యం సీసాలను మూడు మాత్రమే విక్రయించేందుకు పరిమితం చేశామని పేర్కొంది. మరోవైపు మద్యం దుకాణాల వద్ద పర్మిట్ రూములు కూడా తొలగించినట్లు తెలియచేసింది.

ఉదయం 11 నుంచి రాత్రి 8 వరకు..

మద్యం విక్రయాల సమయాన్ని కూడా ఉదయం 11 గంటల నుంచి 8 గంటల వరకు కుదించినట్లు ఉత్తర్వుల్లో తెలిపింది. 840గా ఉండే బార్ల సంఖ్యను కూడా 40 శాతం మేర కుదించి 530కు తగ్గించినట్లు వివరించింది.

ఇవీ చూడండి : వైద్యుల నిర్లక్ష్యంతో బాలింత మృతి!