ఎన్నికల హామీలే లక్ష్యంగా

తెలంగాణ బడ్జెట్​ సమావేశాలు నాలుగు రోజుల పాటు జరగనున్నాయి.  ప్రస్తుత పథకాల కొనసాగింపుతో పాటు ఎన్నికల హామీలు పూర్తి స్థాయిలో అమలు చేసే లక్ష్యంగా ఓట్​ ఆన్​ అకౌంట్​  బడ్జెట్ ఉండనుంది. ఆసరా ఫించన్లు, రైతుబంధు సాయం పెంపు, రైతురుణమాఫీకి బడ్జెట్​లో నిధులు కేటాయించనున్నారు. పాలమూరు - రంగారెడ్డి, డిండి ఎత్తిపోతల ప్రాజెక్టులకు ఈ సారి అధికంగా నిధులు కేటాయించాలని రాష్ట్ర ప్రభుత్వం యోచిస్తుంది.

వచ్చే ఆర్థిక సంవత్సరానికి రాష్ట్ర వార్షిక బడ్జెట్ రూపకల్పన కసరత్తు కొనసాగుతోంది. ఈ నెల నాలుగో వారంలో బడ్జెట్ సమావేశాలు జరిగే అవకాశం ఉంది. కేంద్ర ప్రభుత్వం ఓటాన్ అకౌంట్ బడ్జెట్ ప్రవేశపెట్టిన నేపథ్యంలో రాష్ట్రంలోనూ ఆ బడ్జెట్ ప్రవేశపెట్టనుంది. కేంద్ర ప్రభుత్వ ప్రాయోజిత పథకాలకు ఇచ్చే నిధుల విషయంలో కొంత స్పష్టత వచ్చింది.

బడ్జెట్ ప్రతిపాదనల తయారీకి సంబంధించి ముఖ్యమంత్రి కేసీఆర్ ఇప్పటికే అధికారులకు దిశానిర్ధేశం చేశారు. ఎప్పటి లాగానే సంక్షేమ బడ్జెట్ ఉండాలని.. నీటిపారుదలకు ప్రాధాన్యం ఇవ్వాలని తెలిపారు. ఇటీవలి శాసనసభ ఎన్నికల్లో తెరాస ఇచ్చిన హామీలన్నింటినీ అమలు చేసే దిశగా బడ్జెట్ రూపొందించాలని సీఎం స్పష్టం చేశారు. ఇప్పుడున్న పథకాలన్నింటినీ కొనసాగిస్తూనే.. ఎన్నికల్లో హామీ ఇచ్చిన ఆసరా ఫించన్ల మొత్తం పెంపు, 57 ఏళ్ల వయస్సు పైబడిన వారికి వృద్ధాప్య పింఛను ఇచ్చేందుకు నిధులు కేటాయించాల్సి ఉంది. నిరుద్యోగ భృతి, ఉద్యోగుల వేతనసవరణ తదితర అంశాలకు సంబంధించి ప్రభుత్వం ఇంకా నిర్ణయం తీసుకోలేదు.
సమావేశానికి నాలుగు రోజులు సరిపోతాయనే ఆలోచనలో రాష్ట్ర ప్రభుత్వం ఉంది. మెుదటిరోజు బడ్జెట్​ను ప్రవేశపెట్టి, దానిపై రెండు రోజుల పాటు చర్చ జరపనుంది. చివరిరోజు బిల్లు ప్రవేశపెట్టి ఆమోదం తెలపనుంది. ఫిబ్రవరిలో బడ్జెట్​ సమావేశాలు ముగించి, మార్చిలో లోక్​సభ ఎన్నికలకు పూర్తిస్థాయిలో సన్నద్ధం కావాలని సీఎం కేసీఆర్​ యోచిస్తున్నారు.