RailTel launches PM-WANI: దేశవ్యాప్తంగా రైల్వేస్టేషన్లలో ఉచిత వైఫై సేవలను మరింత వేగంగా అందించేందుకు ప్రభుత్వరంగ సంస్థ రైల్‌టెల్‌ శ్రీకారం చుట్టింది. తొలి దశలో భాగంగా 100 స్టేషన్లలో 'ప్రధానమంత్రి వైఫై యాక్సెస్‌ నెట్‌వర్క్‌ ఇంటర్‌ఫేస్‌ (పీఎం- వాణి)' సేవలను ప్రారంభించింది. మొత్తం 22 రాష్ట్రాల్లోని 71 ఏ1, ఏ కేటగిరీ స్టేషన్లతో పాటు ఇతర కేటగిరీలకు చెందిన మరో 29 స్టేషన్లలో ఈ సేవలు అందుబాటులోకి వచ్చాయి.
'పీఎం-వాణి' ఆధారిత ఉచిత వైఫై సేవల్ని పొందేందుకు ఆండ్రాయిడ్‌ ఆధారిత 'వై-డాట్‌' అనే యాప్‌ను గూగుల్‌ ప్లేస్టోర్‌ నుంచి డౌన్‌లోడ్‌ చేసుకోవాల్సి ఉంటుంది. ఎప్పటిలా రైల్వేస్టేషన్లలో 'రైల్‌వైర్‌ సర్వీస్‌ సెట్‌ ఐడెంటిఫయర్‌' ద్వారా కూడా వైఫై సేవలను ఆనందించొచ్చు. ఈ మొబైల్‌ యాప్‌ పద్ధతి దానికి అదనం. వాణి సర్వీసును వినియోగించాలనుకున్న ప్రతిసారి ఓటీపీ అవసరం లేకుండా ఓకేసారి కేవైసీ వివరాలు యాప్‌లో సమర్పిస్తే సరిపోతుందని రైల్‌టెల్‌ తెలిపింది.