వయసు పెరుగుతున్న కొద్దీ.. వ్యాధుల బారిన పడే అవకాశాలూ అధికంగా ఉంటాయి. ముఖ్యంగా జీవన శైలి వ్యాధులు ఇటీవల కాలంలో ఎంతోమందిని ఇబ్బంది పెడుతున్నాయి. 30 ఏళ్లు దాటితే చాలు.. బీపీ, మదుమేహంలాంటివి సర్వసాధారణం అయ్యాయి. చిన్న వయసులోనే గుండె, మూత్రపిండాలు దెబ్బతింటున్న వారినీ చూస్తున్నాం. ఈ నేపథ్యంలో ఆరోగ్య బీమా పాలసీలను ఎంపిక చేసుకునేటప్పుడు గతంతో పోలిస్తే మరింత అప్రమత్తంగా ఉండాల్సిన అవసరం ఎంతైనా ఉంది.
ఎంత మొత్తానికి..
పెరుగుతున్న వైద్య ఖర్చుల నేపథ్యంలో ఎంత మొత్తానికి ఆరోగ్య బీమా పాలసీ తీసుకోవాలన్నదే ఇప్పుడు చాలా కీలకంగా మారింది. ఇప్పటికే కార్యాలయంలో బృంద బీమా రక్షణ లభిస్తున్నా.. సొంతంగా మరో పాలసీ తీసుకోవడం మంచిది. వ్యక్తిగత పాలసీ తీసుకోవాలా.. కుటుంబం అంతటికీ వర్తించేలా ఫ్యామిలీ ఫ్లోటర్‌ పాలసీని ఎంచుకోవాలా అన్నది నిర్ణయించుకోవాలి. మీ వయసు, కుటుంబ ఆరోగ్య చరిత్ర, ముందస్తు వ్యాధుల్లాంటి వాటిని పరిగణనలోకి తీసుకోవాలి. వైద్య ద్రవ్యోల్బణం ఎప్పటికప్పుడు పెరుగుతోంది. దీన్నీ లెక్కలోకి చూసుకొని సరైన పాలసీ మొత్తాన్ని ఎంచుకోవాలి. జీవితాంతం వరకూ పునరుద్ధరణకు అవకాశం ఉండే పాలసీలే మేలు. అదే సమయంలో మంచి చెల్లింపుల చరిత్ర ఉన్న సంస్థ నుంచి పాలసీ తీసుకోవాలి.
ఎప్పుడు తీసుకోవాలి?
చాలామంది తాము ఆరోగ్యంగానే ఉన్నాం.. ఇప్పుడే వైద్య బీమా పాలసీతో ఏం అవసరం అన్న ప్రశ్న వేస్తుంటారు. అనారోగ్యం ఎప్పుడూ చెప్పిరాదు. ఆసుపత్రిలో చేరిన తర్వాత చికిత్స కోసం ఎంత ఖర్చవుతుందో చెప్పలేం. అందుకే, వీలైనంత చిన్న వయసులో ఆరోగ్య బీమా పాలసీ తీసుకోవడం మంచిది. 30 ఏళ్లలోపు పాలసీ తీసుకోవడం మర్చిపోవద్దు. వయసు పెరుగుతున్న కొద్దీ.. ఆరోగ్య బీమా పాలసీ ఇవ్వాలంటే.. ముందస్తు వైద్య పరీక్షలు తప్పనిసరి అంటాయి బీమా సంస్థలు. వయసుతోపాటు బరువు పెరగడం సహజం. దీంతోపాటు ఏదైనా ఆరోగ్య సమస్య వస్తే.. సంస్థ పాలసీ ఇవ్వడానికి కాస్త వెనకాడవచ్చు. ఇచ్చినా అధిక ప్రీమియం వసూలు చేస్తాయి. ముందస్తు వ్యాధులకు మినహాయింపు ఉండే ఆస్కారం ఉంది. ముందస్తు వ్యాధుల చికిత్సకు వెంటనే పరిహారమూ లభించదు. కొన్ని పాలసీలు మూడు నుంచి నాలుగేళ్ల వరకూ వీటికి రక్షణ కల్పించవు. కాబట్టి, పూర్తి ఆరోగ్యంగా ఉన్నప్పుడే ఈ పాలసీని తీసుకోవడం మంచిది.