ప్రశాంతతతో లాభాలు

దేశ రాజకీయ బౌగోళిక ఉద్రిక్తతలు సద్దుమణుగుతున్న వేళ స్టాక్​ మార్కెట్లు లాభాల్లో ట్రేడవుతున్నాయి.

భారత్​, పాకిస్థాన్​ మధ్య ఉద్రిక్తతలు తగ్గిన నేపథ్యంలో స్టాక్​మార్కెట్లు లాభాల్లో కొనసాగుతున్నాయి. 36,141.07 పాయింట్ల వద్ద ప్రారంభమైన బాంబే ఎక్స్చేంజి సూచీ - సెన్సెక్స్​ 51 పాయింట్ల వృద్ధిలో ఉంది. 10,864.85 పాయింట్ల వద్ద మొదలైన జాతీయ స్టాక్​ ఎక్స్చేంజి సూచీ-నిఫ్టీ 0.18 శాతం ఎగబాకింది.

చైనా ఆర్థిక వృద్ధిపై ఆందోళనలు సహా అమెరికా-చైనా వాణిజ్య ఒప్పందానికి ముందు మదుపర్లు ఆచితూచి వ్యవహరించగా... ఉదయం మార్కెట్లు నష్టాలతో ప్రారంభమయ్యాయి. కాసేపటికి కోలుకున్నాయి. సెన్సెక్స్ సూచీలో ఉత్పాదక వస్తువులు, ఐటీ రంగ షేర్లు బలహీనంగా ఉన్నాయి.

శుక్రవారం సెషన్​లో సెన్సెక్స్ 196 పాయింట్లు లాభపడి 35,063.81 పాయింట్లు, నిఫ్టీ 10,863.50 పాయింట్ల వద్ద ముగిశాయి.

ప్రభావం చూపేవి...

ప్రపంచంలో రెండో అతిపెద్ద ఆర్థిక వ్యవస్థ అయిన చైనా... వృద్ధిరేటు అంచనాలను 6.5 నుంచి 6 శాతానికి తగ్గించింది. ఆర్థిక వృద్ధి నెమ్మదించటం ఇంకా కొనసాగుతుందన్న వార్తలు మార్కెట్లపై ప్రభావం చూపే అవకాశాలున్నాయి.

ఏ ఇతర అంశాలు ప్రభావం చూపించనట్లయితే దేశీయ మార్కెట్లను స్థూల ఆర్థిక గణాంకాలు, ముడిచమురు ధరలు, విదేశీ నిధుల రాక, రూపాయి విలువ ప్రభావితం చేస్తాయని నిపుణులు అభిప్రాయం వ్యక్తం చేశారు.

ఆసియాలోని షాంఘై కాంపోజిట్​ సూచీ 0.2 శాతం, హాంకాంగ్​కు చెందిన హ్యాంగ్​సెంగ్​ సూచీ 0.6 శాతం, టోక్యో సూచీ 0.6 శాతం నష్టాల్లో ఉన్నాయి.