మార్కెట్ల బేజారు- 50వేల దిగువకు సెన్సెక్స్

వరుసగా నాలుగో రోజూ స్టాక్​ మార్కెట్లు భారీ నష్టాలను చవిచూశాయి. బీఎస్​ఈ సూచీ ​ 562 పాయింట్లు తగ్గి.. 49,802 వద్ద స్థిరపడింది. మరో సూచీ నిఫ్టీ 14,721 వేల పాయింట్ల వద్దకు చేరింది.

అంతర్జాతీయ ప్రతికూలతల కారణంగా దేశీయ స్టాక్​ మార్కెట్లు వరుసగా నాలుగో రోజు భారీ నష్టాల్లో ముగిశాయి. బొంబాయి స్టాక్​ ఎక్సేంజీ సూచీ- సెన్సెక్స్​ 562 పాయింట్లు తగ్గి 49,802 వద్ద స్థిరపడింది. నేషనల్​ స్టాక్​ ఎక్సేంజీ సూచీ నిఫ్టీ 189 పాయింట్లు కోల్పోయి 14 వేల 721 వద్ద ముగిసింది. ప్రభుత్వ రంగ బ్యాంకులతో పాటు.. ఆటో, లోహ రంగ​ షేర్లు అమ్మకాల ఒత్తిడిని ఎదుర్కొన్నాయి.

ఇంట్రాడే సాగిందిలా..

సెన్సెక్స్​ 50,561 పాయింట్ల వద్ద గరిష్ఠాన్ని తాకి.. 49,719 పాయింట్ల కనిష్ఠాన్ని నమోదు చేసింది.

మరో సూచీ నిఫ్టీ 14,957 పాయింట్ల గరిష్ఠాన్ని, 14,696 పాయింట్ల కనిష్ఠాన్ని తాకింది.

లాభాల్లో ఉన్న షేర్లు..

ఐటీసీ, ఇన్ఫోసిస్, టీసీఎస్​ వంటి ఐటీ షేర్లు స్వల్ప లాభాలను ఆర్జించగా.. ఇతర ప్రధాన కంపెనీల షేర్లన్నీ నష్టాల్లో కొనసాగాయి.

నేటి సెషన్​లో ఓఎన్​జీసీ షేరు అధికంగా నష్టపోయి.. 5 శాతం మేర తగ్గింది. బజాజ్​ ఆటో, పవర్​గ్రిడ్​, సన్​ ఫార్మా, ఎస్​బీఐఎన్, ఎన్టీపీసీ షేర్లు ఎక్కువగా నష్టపోయాయి.

ఈక్విటీ మార్కెట్​లో రిలయన్స్ ఇండస్ట్రీస్​, హెచ్​డీఎఫ్​సీ, ఐసీఐసీఐ బ్యాంక్​ షేర్లు తీవ్రంగా నష్టపోయాయి.

''దేశవ్యాప్తంగా కరోనా కేసులు పెరుగుతుండటంతో దేశీయ సూచీలు నాలుగు రోజులుగా నష్టాలను చవిచూస్తున్నాయి. అధిక ద్రవ్యోల్బణ సెంటిమెంట్లు సైతం మదుపరుల్లో భయాలకు కారణమయ్యాయి.''

-వినోద్​ మోదీ, హెడ్​ స్ట్రాటజిస్ట్, రిలయన్స్ సెక్యూరిటీస్

వీటికి తోడు అంతర్జాతీయ ప్రతికూలతలు సహా.. యూఎస్​ ఫెడరల్​ రిజర్వ్ విధాన నిర్ణయాలు ప్రకటించనున్న నేపథ్యంలో దేశీయ మార్కెట్లు నష్టాల్లో ముగిశాయి.

ఆసియా-ఐరోపా మార్కెట్లు..

ఆసియా మార్కెట్లు సైతం ప్రతికూలంగా ట్రేడవుతున్నాయి. షాంఘై, సియోల్, టోక్యో స్టాక్ ఎక్స్ఛేంజీలు నష్టాల్లో ఉండగా.. హాంకాంగ్, మార్కెట్లు లాభాల్లో కొనసాగుతున్నాయి. ఐరోపా​ మార్కెట్లు సైతం నష్టాల్లో కొనసాగుతున్నాయి.

ముడిచమురు..

అంతర్జాతీయంగా చమురు ధరలు 0.89 శాతం పెరిగాయి. దీంతో బ్యారెల్ చమురు ధర రూ.67.78 డాలర్లకు చేరింది.

ఇదీ చదవండి:'ఆసీస్​ తరహా చట్టంతో వార్తలకు డబ్బు వసూలు!'