రాష్ట్రంలో జులై నెలలో మద్యం అమ్మకాలు తగ్గినా డిపోల్లో నుంచి సరకు మాత్రం విరివిగా పంపిణీ జరిగింది. ఒక్క నెలలోనే ఏకంగా సుమారు రూ.2,507 కోట్ల మద్యం... దుకాణాలకు సరఫరా అయింది. గత ఏడాది జులైతో పోల్చితే ఇది సుమారు రూ.600 కోట్లు అధికం. అయితే విక్రయాలపరంగా చూస్తే బీర్‌ కేస్‌ల సంఖ్య భారీగా తగ్గింది. ఈ ఏడాది మద్యం ధరలు పెరగడంతోపాటు పొరుగునే ఉన్న ఆంధ్రప్రదేశ్‌కు సరకు తరలిపోతుండటం ఆదాయం పెరగడానికి ప్రధాన కారణాలుగా కనిపిస్తున్నాయి.
- గత ఏడాది జులైలో 31.48లక్షల కేస్‌ల లిక్కర్‌ అమ్ముడుపోగా.. 41.7లక్షల కేస్‌ల బీర్లు అమ్ముడయ్యాయి.సుమారు రూ.1900కోట్ల ఆదాయం సమకూరింది.
- ఈసారి 31.34 లక్షల కేస్‌ల లిక్కర్‌ డిపోల నుంచి దుకాణాలకు దిగుమతి అయింది. అలాగే 22.99 లక్షల కేస్‌ల బీర్లు సరఫరా అయ్యాయి. దాదాపు రూ.2,500 కోట్ల ఆదాయం లభించడం గమనార్హం.