ప్రపంచ ఖరీదైన నివాస నగరాల్లో దిల్లీకి 9వ ర్యాంక్​

ప్రపంచవ్యాప్తంగా.. అత్యధిక ఖరీదైన గృహాలు గల నగరాల జాబితాలో దిల్లీ గతంతో పోలిస్తే ఒక స్థానం ఎగబాకి 9వ స్థానంలో నిలిచింది. రియల్టీ సంస్థ 'నైట్​ ఫ్రాంక్' విడుదల చేసిన ఈ జాబితాలో మాస్కో తొలి స్థానంలో ఉంది.

ప్రపంచంలో వేగాంగా అభివృద్ధి చెందుతున్న 'ప్రైమ్ రెసిడెన్షియల్ మార్కెట్ల'లో భారత రాజధాని దిల్లీ 9వ స్థానాన్ని దక్కించుకుంది. గతంతో పోలిస్తే దిల్లీ ఒక స్థానం మెరుగుపడింది. ఈ జాబితాలో రష్యా రాజధాని మాస్కో ప్రథమ స్థానంలో నిలిచింది.

ప్రపంచ ప్రఖ్యాత స్థిరాస్థి రంగ సంస్థ 'నైట్​ ఫ్రాంక్​' 2019 మూడో త్రైమాసిక 'ప్రైమ్ గ్లోబల్ సిటీస్​ ఇండెక్స్​'ను విడుదల చేసింది. ప్రపంచ వ్యాప్తంగా 45 ప్రధాన నగరాల్లో ప్రైమ్ రెసిడెన్షియల్ ధరలను స్థానిక మారకాల ఆధారంగా గమనిస్తూ.. ఈ ర్యాంకులను ప్రకటించింది.

• ఈ జాబితాలో బెంగళూరు.. గతంతో పోలిస్తే ఐదు స్థానాలు తగ్గి 20వ స్థానానికి చేరింది.
• దేశ వాణిజ్య రాజధాని ముంబయి.. నాలుగు స్థానాలు ఎగబాకి 28వ స్థానంలో నిలిచింది.

ధరల్లో పెరుగుదల ఇలా..

గత 12 నెలల్లో మాస్కోలో ప్రైమ్ నివాస గృహాల ధరలు 11.1 శాతం పెరిగినట్లు నైట్​ ఫ్రాంక్ నివేదికలో తెలిపింది.
భారత్​ విషయానికి వస్తే.. దిల్లీలో 4.4 శాతం, బెంగళూరులో 2.1 శాతం, ముంబయిలో 0.8 శాతం ధరలు పెరిగినట్లు వెల్లడైంది.

ఇదీ చూడండి: బీఎస్ఎన్​ఎల్​ వీఆర్​ఎస్ దరఖాస్తులు​ @77,000