160 కోట్ల మంది జీవనోపాధిపై కరోనా దెబ్బ

అసంఘటిత రంగంపై కరోనా ప్రభావం భారీగా ఉందని అంతర్జాతీయ కార్మిక సంస్థ స్పష్టంచేసింది. ఈ రంగంలోని సుమారు 160 కోట్ల మంది ఉద్యోగులు లేదా కార్మికులు జీవనోపాధి కోల్పోనున్నారని అంచనా వేసింది.

కరోనా సంక్షోభం కారణంగా అసంఘటిత రంగంలోని 160 కోట్ల మంది కార్మికులపై ప్రభావం పడుతుందని అంతర్జాతీయ కార్మిక సంస్థ (ఐఎల్​ఓ) లెక్కగట్టింది. ఈ సంఖ్య ప్రపంచ శ్రామిక శక్తిలో సగమని తెలిపింది. పనిగంటల తగ్గింపు వల్ల వీరంతా జీవనోపాధి కోల్పోనున్నారని ఐఎల్​ఓ అంచనా వేసింది.

బుధవారం విడుదల చేసిన 'కొవిడ్- 19 అండ్​ ద వరల్డ్ ఆఫ్ వర్క్' మూడో నివేదికలో పలు విషయాలు వెల్లడించింది ఐరాస అనుబంధ సంస్థఅయిన ఐఎల్​ఓ. ప్రపంచవ్యాప్తంగా ఉన్న 43 కోట్ల వ్యాపారాలు కరోనా సంక్షోభంలో చిక్కుకుపోయాయని పేర్కొంది. రిటైల్, తయారీ రంగాలు ప్రమాదంలో పడ్డాయని తెలిపింది.

ఇదీ పరిస్థితి..

అంతర్జాతీయంగా 330 కోట్ల మంది ఉద్యోగుల్లో 200 కోట్ల మంది అసంఘటిత రంగంలోనే పనిచేస్తున్నట్లు ఐఎల్​ఓ పేర్కొంది. వీరిలో 160 కోట్ల మంది జీవనానికి సరిపడా ఆదాయం లేక తీవ్ర ఇబ్బందులు ఎదుర్కొంటారని అంచనా వేసింది. ఫలితంగా ఆర్థిక వ్యవస్థ పతనావస్థకు చేరుకుంటుందని హెచ్చరించింది.

"కోట్ల మంది కార్మికులకు ఆదాయం లేదు. అంటే ఆహారం లేనట్లే. ఫలితంగా వారి భద్రత, భవిష్యత్తు శూన్యం. ప్రపంచవ్యాప్తంగా లక్షలాది వ్యాపారాలు తీవ్ర ఇబ్బందుల్లో ఉన్నాయి. వాటికి మిగులు లేకపోగా.. రుణాలు అందే పరిస్థితి కూడా లేదు. ఇదే ప్రస్తుత ప్రపంచ ముఖచిత్రం. ఈ సమయంలో మేం ఎలాంటి సాయం చేయలేకపోతున్నాం. వినాశనం తప్పదు."

- గయ్ రైడర్, ఐఎల్​ఓ డైరెక్టర్ జనరల్

ప్రపంచ దేశాలు లాక్​డౌన్​ అమలు చేస్తోన్న నేపథ్యంలో మొదటి నెలలోనే 60 శాతం ఆదాయంలో కోతలు పడ్డాయని ఐఎల్​ఓ అంచనాల్లో తేలింది. అమెరికా, ఆఫ్రికాల్లో 80 శాతం, ఐరోపా, మధ్య ఆసియాలో 70 శాతం , ఆసియా పసిఫిక్​ ప్రాంతాల్లో 21.6 శాతం కోతలు విధించినట్లు వెల్లడైంది.

పని గంటల్లో క్షీణత..

సంక్షోభానికి ముందు పరిస్థితులతో పోల్చి చూస్తే.. రెండో త్రైమాసికం పని గంటల్లో 10.5శాతం క్షీణత ఉంటుంది. అంటే ఇది 30.5 కోట్ల ఫుల్​టైమ్ ఉద్యోగాలకు సమానం. గతంలో నమోదైన క్షీణత 6.7 శాతం. అంటే 19.5 కోట్ల ఫుల్​టైమ్ ఉద్యోగాలుగా ఉండేది.

దేశాల వారీగా.. అమెరికాలో 12.4 శాతం, ఐరోపా, మధ్య ఆసియాల్లో 11.8 శాతం, మిగతా ప్రాంతాల్లో 9.5 శాతం పని గంటల్లో క్షీణత ఉందని ఐఎల్​ఓ తెలిపింది. గత రెండు వారాలుగా మానవ వనరుల అవసరాలు కూడా 81 నుంచి 68 శాతానికి పడిపోయినట్లు విశ్లేషించింది.

ప్రభుత్వాలు సాయం అందించాలి..

ఈ నేపథ్యంలో అసంఘటిత రంగంలో ఉన్న వ్యాపారాలు, కార్మికులను కాపాడుకునేందుకు తక్షణమే చర్యలు చేపట్టాలని ప్రపంచ దేశాలకు ఐఎల్​ఓ పిలుపునిచ్చింది. దృఢమైన ఉద్యోగ విధానాలు, సంస్థలు, సామాజిక భద్రత, అంతర్జాతీయ సమన్వయంతో సాయాన్ని అందించాలని సిఫార్సు చేసింది.