అక్టోబర్​లో 5.4 శాతం క్షీణించిన భారత ఎగుమతులు

దేశ ఎగుమతులు అక్టోబర్​లో 5.4 శాతం తగ్గాయి. ఇదే సమయంలో దిగుమతులు కూడా 11.56 శాతానికి పడిపోయాయి. గత నెల దేశ వాణిజ్య లోటు 8.78 బిలియన్​ డాలర్లుగా నమోదైంది.

అక్టోబర్​లో భారత ఎగుమతులు 5.4 శాతం తగ్గి.. 24.82 బిలియన్ డాలర్లుగా నమోదయ్యాయి. పెట్రోలియం ఉత్పత్తులు, రత్నాలు, ఆభరణాలు, లెదర్ విభాగాల్లో షిప్మెంట్లు తగ్గిన కారణంగా ఈ క్షీణత నమోదైనట్లు మంగళవారం విడుదల చేసిన నివేదికలో వెల్లడించింది వాణిజ్య, పరిశ్రమల మంత్రిత్వ శాఖ.

ఇదే సమయానికి దేశ దిగుమతులు కూడా భారీగా 11.56 శాతం తగ్గి.. 33.6 బిలియన్ డాలర్లుగా నమోదైనట్లు వెల్లడించింది.

అక్టోబర్​లో భారత వాణిజ్య లోటు.. గత ఏడాది ఇదే నెలతో పోలిస్తే 11.76 బిలియన్ డాలర్ల నుంచి.. 8.78 బిలియన్ డాలర్లకు తగ్గినట్లు పేర్కొంది.

ప్రస్తుత ఆర్థిక సంవత్సరం ఏప్రిల్-అక్టోబర్ మధ్య దేశ ఎగుమతులు 150.07 బిలియన్ డాలర్లకు పరిమితమైనట్లు కేంద్రం తెలిపింది. గత ఏడాది ఇదే సమయంతో పోలిస్తే ఈ మొత్తం 19.05 శాతం తక్కువని వివరించింది.

ఇదీ చూడండి:స్వల్పంగా పెరిగిన బంగారం, వెండి ధరలు