వృద్ధి భయాలతో రికార్డు స్థాయిలు కోల్పోయిన సూచీలు

స్టాక్ మార్కెట్లను వారాంతంలో వృద్ధి భయాలు వెంటాడాయి. ఈ కారణంగా సెన్సెక్స్​ 336 పాయింట్లు నష్టపోయింది.. నిప్టీ 95 పాయింట్లు క్షీణించింది. ఎస్​ బ్యాంక్ అత్యధికంగా 2.50 శాతం నష్టాన్ని నమోదు చేసింది.

ఇటీవల వరుస లాభాలతో సరికొత్త రికార్డులు నమోదు చేసిన స్టాక్​ మార్కెట్లు వారాంతంలో భారీ నష్టాలతో ముగిశాయి. ఆర్థిక వృద్ధి భయాలతో లాభాల స్వీకరణకు మొగ్గు చూపారు మదుపరులు. 2019-20 రెండో త్రైమాసిక జీడీపీ గణాంకాలు 5 శాతం కన్నా తక్కువగా ఉండొచ్చన్న అంచనాలు మదుపరుల సెంటిమెంట్​ను దెబ్బతీశాయని నిపుణులు చెబుతున్నారు.

బొంబాయి స్టాక్​ ఎక్స్చేంజి సూచీ-సెన్సెక్స్ 336 పాయింట్లు కోల్పోయింది. చివరకు 40,794 వద్ద స్థిరపడింది. జాతీయ స్టాక్​ ఎక్స్చేంజి సూచీ-నిఫ్టీ 95 పాయింట్ల నష్టంతో..12,056 వద్దకు చేరింది.

ఈ వారం మొత్తం మీద.. సెన్సెక్స్ 434 పాయింట్లు బలపడింది. నిఫ్టీ 142 పాయింట్లు పుంజుకుంది.

ఇంట్రాడే సాగిందిలా..

సెన్సెక్స్​ 41,143 పాయింట్ల వద్ద జీవనకాల గరిష్ఠాన్ని తాకగా.. 40,664 పాయింట్ల కనిష్ఠాన్ని నమోదు చేసింది.

నిఫ్టీ నేడు 12,147 పాయింట్ల అత్యధిక స్థాయి.. 12,017 పాయింట్ల అత్యల్ప స్థాయిల మధ్య కదలాడింది.

లాభనష్టాల్లోనివి ఇవే..

భారతీ ఎయిర్​టెల్​ 1.28 శాతం, హెచ్​డీఎఫ్​సీ బ్యాంక్ 0.70 శాతం, ఎన్​టీపీసీ 0.35 శాతం లాభాలను ఆర్జించాయి. 30 షేర్ల ఇండెక్స్​లో ఈ మూడు షేర్లు మాత్రమే లాభాలను నమోదు చేశాయి.

ఎస్​ బ్యాంక్​ 2.50 శాతం, హెచ్​యూఎల్ 2.37 శాతం, ఎం&ఎం 2.12 శాతం, ఎస్​బీఐ 2.03 శాతం, టాటా మోటార్స్ 2.03 శాతం, వేదాంత 2 శాతం నష్టాలను మూటగట్టుకున్నాయి.

ఇదీ చూడండి:ప్రపంచ కుబేరుల్లో 9వ స్థానానికి ముకేశ్ అంబానీ