జియో మ్యాజిక్​: ఈనెల 5న రాబోయే 5 అద్భుతాలు

డేటా డాన్ రిలయన్స్... ప్రతి ఇంటిని స్మార్ట్​మయం చేసేందుకు సిద్ధమైంది. ఇందుకోసం 'జియో ఫైబర్'​ తెస్తున్నట్లు వార్షిక సర్వసభ్య సమావేశంలో ప్రకటించింది. సేవలు ప్రారంభించడానికి ముహూర్తం సెప్టెంబర్​ 5. ఈ నేపథ్యంలో ఇంటిని ఫైబర్ ఫ్రెండ్లీ చేసేందుకు నిర్ణయించుకునే ముందు మీరు లుక్కేయాల్సిన ఐదు అంశాలు.

ఎంతోకాలంగా ఎదురుచూస్తున్న జియో ఫైబర్​ను రిలయన్స్ సంస్థ సెప్టెంబర్ 5న వినియోగదారులకు అందుబాటులోకి తీసుకురానుంది. టారిఫ్​ ప్లాన్లతో పాటు పలు కీలక అంశాలపై అదే రోజు ప్రకటన చేయనుంది. జియో ఫైబర్​ సేవల ప్రారంభంతోపాటు.... రిలయన్స్ జియో టారిఫ్​ ప్లాన్లలోనూ భారీ మార్పులు చేసే అవకాశముంది.
జియో... టెలికాం రంగంలో ఇప్పటికే విప్లవాత్మక మార్పులు తీసుకొచ్చింది. డీటీహెచ్​, బ్రాడ్​బ్యాండ్​, ల్యాండ్​లైన్​, ఓటీటీ వంటి అంశాల్లో జియో ఫైబర్​ అలాంటి అద్భుతాలే సృష్టిస్తుందని అంచనా.

జియో 4కే సెట్​ టాప్ బాక్స్

జియో ఫైబర్ సేవలు ఆస్వాదించేందుకు 4కే సెట్​ టాప్​ బాక్సే కీలకం. ఇది ఇప్పుడు మార్కెట్​లో అందుబాటులో ఉన్నటువంటిది కాదు. వినియోగదారులు ప్రస్తుతం వీక్షిస్తున్న డీటీహెచ్ ఛానళ్లతో పాటు ఓవర్​ ద టాప్ ద్వారా జియో సావన్, జియో టీవీ వంటి పలు రకాల సేవలు పొందవచ్చు.

వీడియో కాన్ఫరెన్సింగ్, గేమింగ్​తో పాటు మిక్స్​డ్ రియాలిటీ వంటి ఫీచర్లు జియో సెట్​ టాప్​ బాక్స్​కు ప్రత్యేక ఆకర్షణ.

జియో ఫిక్స్​డ్ వాయిస్

ఫైబర్ నెట్​వర్క్​తో అందిస్తున్న ల్యాండ్​లైన్ ఫీచర్... జియో ఫిక్స్​డ్ వాయిస్. కొన్ని వారాల క్రితం ఈ ల్యాండ్​లైన్ సేవలపై వినియోగదారులకు ఓ నోటిఫికేషన్​ను పంపింది రిలయన్స్. సెప్టెంబర్​ 5న జియో ఫిక్స్​డ్​ వాయిస్​ ల్యాండ్​లైన్​ విషయంపై మరింత స్పష్టత రానుంది.

అంతర్జాతీయ కాల్స్...

అపరిమిత అంతర్జాతీయ కాల్స్ మాట్లాడుకునేందుకు వీలుగా ఇంటర్నేషనల్ ల్యాండ్​లైన్ రోమింగ్ ప్యాక్​ను అతితక్కువ ధరకే అందించనుంది జియో. ప్రయోగాత్మకంగా నెలకు రూ. 500 ధరతో అమెరికా, కెనడాకు అపరిమిత కాల్స్ మాట్లాడుకునే సౌలభ్యాన్ని కల్పిస్తోంది. రిలయన్స్ ప్లాన్ ప్రస్తుత టారిఫ్​లతో పోల్చితే ఐదు లేదా పదో వంతు ఉంటుందని అంచనా.

ధర: కొద్దిగా ప్రియమే!

జియో ఫైబర్ టారిఫ్​లు కాస్త ఎక్కువగా ఉండనున్నాయని తెలుస్తోంది. రూ. 700 నుంచి ఫైబర్ ప్రాథమిక ధర ఉంటుందని ఏజీఎం వేదికగా ప్రకటించారు ముఖేశ్. 1జీబీపీఎస్ సేవలకు అది కాస్త ప్రియంగా... ​రూ. 10వేల ధర ఉండనుందని తెలిపారు. అయితే వివిధ ప్లాన్ల ధరలు సవివరంగా సెప్టెంబర్​ 5నే వెలువడనున్నాయి.

జియో కాల్...

జియో ఫైబర్​ కనెక్షన్-సెట్​టాప్​ బాక్స్​తో పాటు అందే మరో సౌకర్యం జియో కాల్. 42వ సర్వసభ్య సమావేశంలోనే ఈ ఆప్షన్ ఎలా పనిచేయబోతోందో ప్రయోగాత్మకంగా చూపింది రిలయన్స్. విడుదల సమయంలోనే ఈ ఫీచర్ గురించి మరింత స్పష్టత రానుంది.

ఇదీ చూడండి: ల్యాండ్​లైన్ ఉంటే 6 స్మార్ట్​ఫోన్స్​ నుంచి కాల్స్​ ఫ్రీ!

జియో గిగాఫైబర్​తో ఇక ఇంట్లోనే 'ఫస్ట్​డే ఫస్ట్​ షో'