ఆగస్టు 22వరకు రిమాండ్​లోనే నీరవ్​ మోదీ

పంజాజ్​ నేషనల్​ బ్యాంకు కుంభకోణం నిందితుడు నీరవ్​ మోదీకి విధించిన జ్యుడీషియల్​ కస్టడీని ఆగస్టు 22వ తేదీ వరకు పొడిగించింది లండన్​ కోర్టు. రుణ ఎగవేత, మనీలాండరింగ్​ కేసులో ఆరోపణలు ఎదుర్కొంటున్న నీరవ్​ నేడు వీడియోలింక్​ ద్వారా విచారణకు హాజరయ్యారు.

వజ్రాల వ్యాపారి నీరవ్​మోదీకి విధించిన జ్యుడీషియల్​ కస్టడీని ఆగస్టు 22 వరకు పొడిగించింది లండన్​లోని వెస్ట్​మినిస్టర్​ మేజిస్ట్రేట్​ కోర్టు. అప్పటివరకు రిమాండ్​లోనే ఉండనున్నారు. ప్రస్తుతం వాండ్స్​వర్త్​ జైలులో శిక్ష అనుభవిస్తున్న నీరవ్​ ఈ రోజు వీడియో లింక్​ ద్వారా విచారణకు హాజరయ్యారు.

పంజాబ్​ నేషనల్​ బ్యాంకుకు 2 బిలియన్​ డాలర్ల రుణాల ఎగవేత సహా మనీలాండరింగ్​ కేసులో నీరవ్​ నిందితుడిగా ఉన్నారు​.

భారత్​కు అప్పగించే అంశంపై అన్ని వర్గాల పరస్పర అంగీకారంతో.. 2020 మేలో ఐదు రోజుల విచారణ జరిపే అవకాశమున్నట్లు కోర్టు పేర్కొంది. ఆయనను స్వదేశానికి రప్పించాలని భారత్ ఎప్పటినుంచో ప్రయత్నాలు చేస్తోంది.

4 సార్లు బెయిల్​ నిరాకరణ...

నీరవ్​ను అప్పగించాలని భారత్​​ చేసిన విజ్ఞప్తి మేరకు లండన్​ కోర్టు మార్చి 18న అరెస్టు వారెంటు జారీ చేసింది. మరుసటి రోజు స్కాట్లాండ్​ యార్డ్​​ అధికారులు నీరవ్​ను అదుపులోకి తీసుకున్నారు. ఇప్పటివరకు ఈ వజ్రాల వ్యాపారి​ 4 సార్లు బెయిల్​కు యత్నించగా.. ప్రతిసారీ కోర్టులో చుక్కెదురైంది.

గత నెలలో యూకే హైకోర్టు బెయిల్​ పిటిషన్​ను తిరస్కరించిన అనంతరం.. నీరవ్​ మోదీ విచారణకు హాజరవడం ఇదే తొలిసారి.