'ఊహకందని వ్యూహాలతోనే 5 ట్రిలియన్లు సాధ్యం' భారత్.. 5 ట్రిలియన్ల డాలర్ల ఆర్థిక వ్యవస్థగా అవతరించాలంటే ఊహకు అందని వ్యూహాలను అమలు చేయాలని మాజీ ప్రధానమంత్రి మన్మోహన్ సింగ్ అభిప్రాయపడ్డారు. దేశంలో ఆర్థిక వృద్ధి మందగించడంపై మన్మోహన్ ఆవేదన వ్యక్తం చేశారు.
"ప్రస్తుతం మన ఆర్థిక వృద్ధి మందగిస్తున్నట్లు తెలుస్తోంది. జీడీపీ రేటు క్షీణిస్తోంది. పెట్టుబడులు స్తబ్తుగా ఉన్నాయి. రైతులు ఇబ్బందులు ఎదుర్కొంటున్నారు. బ్యాంకింగ్ వ్యవస్థ సంక్షోభంలో చిక్కుకుంది. నిరుద్యోగ సమస్య వెంటాడుతోంది. వీటన్నింటిని దాటుకుని ఐదు ట్రిలియన్ డాలర్ల ఆర్థిక వ్యవస్థను రూపొందించే వ్యూహాలు అమలు చేయాలి."
- మన్మోహన్ సింగ్, మాజీ ప్రధానమంత్రి
దేశాభివృద్ధి, పాలన, ఆర్థిక వ్యవస్థకు మన్మోహన్ సేవలకుగానూ జేకే లక్ష్మీపత్ యూనివర్సిటీ 'జేకేఎల్యూ లిటరేచర్ అవార్డు 2019'ను అందించింది. ఈ సందర్భంగా ఏర్పాటు చేసిన కార్యక్రమంలో ఆయన ప్రసంగించారు.
పన్నులు తగ్గించి.. అన్ని స్థాయుల్లోని వ్యవస్థలకు స్వతంత్ర అధికారాలను కల్పించాలని ప్రభుత్వానికి సూచించారు మన్మోహన్ సింగ్.
దేశానికి ప్రస్తుతం జనాభా, సామాజిక అసమానతలు, మతోన్మాదం, అవినీతి వంటి సవాళ్లు ఎదురవుతున్నాయని మన్మోహన్ సింగ్ పేర్కొన్నారు. విద్య, కులతత్వాన్ని తొలగించడం, మహిళా సాధికారత, శిశుసంక్షేమం, మీడియా స్వేచ్ఛ, ఆర్థిక వృద్ధి ద్వారా ఆ సవాళ్లను ఎదుర్కోవచ్చని ఆయన అభిప్రాయపడ్డారు.
ఇదీ చూడండి: 'సవాళ్లు అధిగమించేందుకు సాధ్యమైనంత సాయం'
