త్రైమాసిక ఫలితాలే ఈ వారానికి కీలకం..!

కార్పొరేట్ల రెండో త్రైమాసిక ఫలితాలు సహా.. అంతర్జాతీయంగా అమెరికా చైనా వాణిజ్య చర్చలు ఈ వారం స్టాక్ మార్కట్లను ప్రభావితం చేయనున్నాయి. ముఖ్యంగా టీసీఎస్​, ఇన్ఫోసిస్, విప్రో సంస్థల  ఫలితాల ప్రకటనతో కీలక రంగాల్లో అస్థిరతలు కొనసాగే అవకాశముంది.

స్టాక్ మార్కెట్లు ఈ వారం రేంజ్ బౌండ్​ ట్రేడింగ్​లో కొనసాగే అవకాశముంది. ఈ వారం మార్కెట్లు పని చేసే రోజులు తగ్గడం సహా దిగ్గజ కంపెనీల త్రైమాసిక ఫలితాలు.. మార్కెట్ల గమనాన్ని నిర్దేశించే అవకాశముందని నిపుణులు అంటున్నారు.

విజయదశమి సందర్భంగా ఈ నెల 8న మార్కెట్లకు సెలవు. ఈ కారణంగా ఈ వారం 4 రోజులే మార్కెట్లు పని చేయనున్నాయి.

రెండో త్రైమాసిక ఫలితాల సీజన్​ను టెక్​ దిగ్గజం టీసీఎస్​ ప్రారంభించనుంది. గురువారం ఈ సంస్థ ఫలితాలు ప్రకటించనుండగా.. ఇన్ఫోసిస్​ శుక్రవారం వెల్లడించనుంది.

"ప్రస్తుత ఆర్థిక సంవత్సరంలో రెండో త్రైమాసిక ఫలితాల సీజన్ మొదలైంది. టీసీఎస్, విప్రో, ఇన్ఫోసిస్​ ఫలితాలతో కొన్ని కీలక రంగాల్లో అస్థిరతలు ఏర్పడొచ్చు."
- ముస్తఫా నదీమ్, ఎపిక్ రీసర్చ్ సీఈఓ

మార్కెట్లను ప్రభావితం చేసే దేశీయ కారణాలివే..

ఈ వారం ప్రారంభం కానున్న కార్పొరేట్ల ఫలితాల ప్రకటన, వారాంతలో వెలువడనున్న పారిశ్రామికోత్పత్తి గణాంకాలు మార్కెట్లను ప్రభావితం చేసే ప్రధానాంశాలు.
ఆర్థిక వృద్ధి అంచనాలపైనా మదుపరులు దృష్టి సారించే అవకాశముందని స్టాక్ బ్రోకర్లు అంటున్నారు.

అంతర్జాతీయంగా చూస్తే..

అమెరికా-చైనా వాణిజ్య చర్చలు అంశం స్టాక్ మార్కెట్లను ప్రభావితం చేసే ప్రధాన అంతర్జాతీయ అంశంగా చెప్పొచ్చు. బుధవారం విడుదలకానున్న ఓపెన్​ మార్కెట్ మినిట్స్​పైనా మదుపరులు దృష్టి సారించే అవకాశముంది.

చమురు ధరలు, రూపాయి విలువ హెచ్చుతగ్గులు మార్కెట్లకు కీలకంగా మారనున్నాయి.

ఇదీచూడండి: పన్ను మదింపు సేవలు ఇక మరింత సులభం!