దటీజ్ మారుతి... సంక్షోభంలోనూ సూపర్​ హిట్​!

భారత్ స్టేజ్​ VI ఇంజిన్​ కార్లు విడుదల చేసిన 6 నెలల్లో 2 లక్షల యూనిట్లు విక్రయించినట్లు మారుతీ సుజుకీ ఇండియా ప్రకటించింది. ఆటోమొబైల్​ రంగ సంక్షోభంలోనూ మారుతీ సుజుకీ ఈ స్థాయి అమ్మకాలు సాధించడం గమనార్హం.

మార్కెట్లోకి భారత్ స్టేజ్​ VI ఉద్గార నియమాలు పాటించే మోడళ్లు విడుదలైన ఆరు నెలల్లోనే.. 2 లక్షల యూనిట్లు విక్రయించినట్లు మారుతీ సుజుకీ ఇండియా వెల్లడించింది. ఈ ఏడాది ఏప్రిల్​లో ఆల్టో 800, బాలినో మోడళ్లను బీఎస్ VI ఇంజిన్​తో మార్కెట్లోకి విడుదల చేసింది ఈ ఆటోమొబైల్​ దిగ్గజం.

ప్రస్తుతమున్న 16 మోడళ్లలో 8 కార్లు బీఎస్ VI కాలుష్య నియమాలు పాటించేవేనని మారుతీ సుజుకీ ఇండియా ఎండీ, సీఈఓ కెనిచి అయూకవ తెలిపారు.

వాతావరణ కాలుష్యాన్ని తగ్గించేందుకు బీఎస్​ VI ఉద్గార నియమాలను ప్రవేశపెట్టింది కేంద్రం. బీఎస్​ IVతో పోలిస్తే.. బీఎస్​ VI ఇంజిన్​ వాహనాలు 25 శాతం తక్కువ నైట్రోజన్ ఆక్సైడ్​ను విడుదల చేయడమే ఇందుకు ప్రధాన కారణం. ప్రభుత్వ ఆదేశాలకు అనుగుణంగా బీఎస్​ VI ఇంజిన్​తో కార్లను మార్కెట్లోకి విడుదల చేస్తోంది మారుతీ సుజుకీ.

ఇదీ చూడండి: పసిడి ధరలు మళ్లీ పరుగు.. ప్రస్తుత ధర ఎంతంటే?