ఎస్సీ, ఎస్టీలకు ఉద్యోగ అవకాశాలు పెంచేందుకు.. ప్రభుత్వ, ప్రైవేటు కంపెనీలకు ప్రోత్సాహకాలు ఇచ్చే ఓ పథకాన్ని తీసుకురావాలని భావిస్తోంది కేంద్ర కార్మిక మంత్రిత్వ శాఖ. సీఐఐ, అసోచామ్ వంటి పరిశ్రమ వర్గాలు ఈ విధానానికి సూత్రప్రాయంగా అంగీకారం తెలిపాయి.
ఈ పథకానికి సంబంధించి పరిశ్రమ వర్గాలతో ఇంకా చర్చలు జరుగుతున్నాయని కార్మిక శాఖ మంత్రి సంతోష్ గంగ్వార్ తెలిపారు. ఈ సంప్రదింపుల్లో పరిశ్రమ వర్గాల నుంచి అనేక సలహాలు అందినట్లు పేర్కొన్నారాయన. వాటన్నింటినీ పరిశీలించి తుది నిర్ణయం త్వరలోనే వెల్లడిస్తామన్నారు.
ఇప్పటికే ఉద్యోగుల భవిష్య నిధి సంస్థ (ఈపీఎఫ్ఓ).. 136 ప్రాంతీయ కార్యాలయాల నుంచి ఎస్సీ, ఎస్టీ ఉద్యోగుల వివరాలు సేకరిస్తున్నట్లు ఓ సీనియర్ ప్రభుత్వాధికారి తెలిపారు. ఎస్సీ, ఎస్టీలకు సమాన అవకాశాలు, నియామకాలను ప్రోత్సహించడం కోసం నీతి ఆయోగ్ చేపట్టిన అధ్యయనంలో భాగంగా ఈ డేటాను సేకరిస్తున్నట్లు వెల్లడించారు.