రిలయన్స్ ఇండస్ట్రీస్ తన డిజిటల్‌, వైర్‌లెస్‌ విభాగం జియో ప్లాట్ఫామ్స్ను విదేశాల్లో లిస్టింగ్ చేయాలనే ప్రణాళికలో ఉన్నట్లు తెలుస్తోంది. నెల రోజుల వ్యవధిలోనే 10 బిలియన్‌ డాలర్లకు పైగా (సుమారు రూ.78,000 కోట్ల) పెట్టుబడులను ఆకర్షించిన జియో ప్లాట్ఫామ్స్ను భారత్‌ వెలుపలి స్టాక్ ఎక్స్ఛేంజీల్లో నమోదు చేయాలని రిలయన్స్ అధిపతి ముకేశ్‌ అంబానీ భావిస్తున్నట్లు సమాచారం.
12-24 నెలల్లోనే..
రాబోయే 12-24 నెలల్లో ఈ ఇష్యూ రావొచ్చని అనుకుంటున్నారు. అయితే ఎక్కడ నమోదు చేయాలన్నది కంపెనీ ఇంకా నిర్ణయించలేదని ఈ వ్యవహారాలతో సంబంధం ఉన్న ఒక వ్యక్తి తెలిపారు. సమయం, ఇష్యూ పరిమాణంపై ఇంకా తుది నిర్ణయం జరగలేదని వివరించారు. ఫేస్‌బుక్‌, సిల్వల్‌ లేక్‌ పార్టనర్స్‌, జనరల్‌ అట్లాంటిక్‌ల తర్వాత తాజాగా జియో ప్లాట్‌ఫాయ్స్‌లో కేకేఆర్‌ అండ్‌ కో పెట్టుబడులు పెట్టింది.