కాంట్రాక్టర్ల బకాయిలు చెల్లించండి: పీఎస్​యూలతో నిర్మల

ప్రభుత్వ రంగ సంస్థలు... వ్యాపారులు, కాంట్రాక్టర్లకు చెల్లించాల్సిన బకాయిలు పూర్తిచేయాలని ఆయా సంస్థలకు సూచించింది కేంద్రం. వృద్ధికి ఊతమందించే దిశగా ఈ నిర్ణయాలు తీసుకుంది. అక్టోబర్​ 15ను తుదిగడువుగా నిర్దేశించింది.

వృద్ధికి ఊతమందించే దిశగా ప్రభుత్వం మరిన్ని దిద్దుబాటు చర్యలు ప్రారంభించింది. ఇందులో భాగంగా ప్రభుత్వాధీనంలోని సంస్థలు.. వ్యాపారులకు, కాంట్రాక్టర్లకు చెల్లించాల్సిన దీర్ఘకాలిక బకాయిలను పూర్తి చేసేందుకు సిద్ధమైంది. ఇందుకు అక్టోబర్​ 15ను తుది గడువుగా నిర్దేశించింది కేంద్రం.

ప్రభుత్వ సంస్థల ఉన్నతాధికారులతో.. మూలధన వ్యయాలపై నేడు సమీక్ష సమావేశం నిర్వహించారు ఆర్థిక మంత్రి నిర్మలా సీతారామన్. సర్వీస్ ప్రొవైడర్లు, వ్యాపారులు, కాంట్రాక్టర్లకు బిల్లులకు సంబంధించి ఒక పోర్టల్​ను ఏర్పాటుచేయాలని ఆయా సంస్థలకు సూచించినట్లు మంత్రి తెలిపారు.

వివాదాల కారణంగా ఆగిపోయిన చెల్లింపులు.. వచ్చే నాలుగు త్రైమాసికాలకు సంబంధించిన వ్యయాల నివేదికను సమర్పించాలని ప్రభుత్వ సంస్థలను ఆదేశించినట్లు తెలిపారు సీతారామన్​.

34 ప్రభుత్వ రంగ సంస్థలు ఆగస్టు చివరి నాటికి రూ.48,077 కోట్లు ఖర్చులు చేసినట్లు ఆర్థిక కార్యదర్శి రాజీవ్​కుమార్ వెల్లడించారు. డిసెంబర్​ నాటికి మరో రూ.50,159 కోట్లు.. జనవరి-మార్చి త్రైమాసికానికి రూ.54,700 ఖర్చు చేయనున్నట్లు పేర్కొన్నారు.

ఇదీ చూడండి: పండుగ సీజన్​లో సరికొత్త మొబైల్​ ఫోన్లు