రాత్రివేళల్లో ఒంటరిగా ఆటో, క్యాబ్లలో ప్రయాణించేవారు ఇకమీదట పెద్దగా భయపడాల్సిన అవసరం లేకుండా గూగుల్ మ్యాప్స్ కొత్త సదుపాయాన్ని తీసుకొచ్చింది. ప్రయాణికుల భద్రతను పెంపొందించేలా కొత్త ఫీచర్ను అందుబాటులోకి తెచ్చింది. మీరు ప్రయాణిస్తోన్న వాహనం వేరే మార్గంలో వెళ్తే.. ఈ ఫీచర్ ద్వారా మీ బంధుమిత్రులకు నోటిఫికేషన్ వెళ్తుంది.
లేటెస్ట్ గూగుల్ మ్యాప్స్ వెర్షన్ ఉన్న అన్ని ఆండ్రాయిడ్ ఫోన్లలో ఈ సదుపాయం ఉంటుంది. దోపిడీలు, అఘాయిత్యాలకు అడ్డుకట్ట వేసేందుకు ఈ సదుపాయం ఎంతో ఉపకరిస్తుందని పేర్కొన్నారు గూగుల్ మ్యాప్స్ ప్రొడక్ట్ మేనేజర్ అమందా.
క్యాబ్ లేదా ఆటో డ్రైవర్.. గూగుల్ సూచించిన మార్గాన్ని దాటి అరకిలోమీటరు వెళ్లినా ప్రయాణికుల మొబైల్ను మోగిస్తుంది. ఆ హెచ్చరికతో నోటిఫికేషన్ను ట్యాప్ చేయగానే.. వారు అసలు గమ్యస్థానానికి ఎంతదూరంలో ఉన్నారో తెలుసుకొని.. లైవ్ లొకేషన్ను కుటుంబసభ్యులు, మిత్రులతో పంచుకోవచ్చు.