'కాఫీ డే' సిద్ధార్థకు అన్ని వేల కోట్లు అప్పులా..?

కేఫ్ కాఫీ డే వ్యవస్థాపకుడు వీజీ సిద్ధార్థ అదృశ్యానికి ఆర్థిక ఇబ్బందులే కారణంగా తెలుస్తోంది. ఐడీబీఐ, యాక్సిస్ సహా వివిధ బ్యాంకులకు రూ. 8082.63 కోట్ల రుణాలు కాఫీ డే సంస్థ చెల్లించాల్సి ఉందని సమాచారం.

కర్ణాటక మాజీ ముఖ్యమంత్రి ఎస్​ఎం కృష్ణ అల్లుడు, కేఫ్ కాఫీ డే ఛైర్మన్​ అండ్​ మేనేజింగ్​ డైరెక్టర్​.. వీజీ సిద్ధార్థ అదృశ్యమయ్యారు. సిద్ధార్థ కనిపించకుండా పోవడానికి ఆర్థిక ఇబ్బందులే కారణంగా తెలుస్తోంది. కాఫీ డే ఉద్యోగులు, డైరెక్టర్లకు సిద్ధార్థ రాసిన లేఖ తాజాగా బయటపడింది.

"ప్రతి ఆర్థిక లావాదేవీకి నాదే బాధ్యత. ఎవరినీ మోసం చేయాలన్నది నా ఉద్దేశం కాదు. ఒక వ్యాపారవేత్తగా నేను విఫలం అయ్యాను. నన్ను అర్థం చేసుకుని, మన్నిస్తారని ఆశిస్తున్నా. ఈ లేఖతో పాటు నా ఆస్తుల వివరాలతో కూడిన ఓ పత్రాన్ని పొందుపరుస్తున్నాను. నా ఆస్తుల విలువ అప్పులకన్నా ఎక్కువే ఉంది. రుణదాతలు అందరికీ తిరిగి చెల్లించేందుకు వీలు ఉంటుంది" అని సిద్ధార్థ లేఖలో పేర్కొన్నారు. నూతన యాజమాన్యంతో కాఫీ డే వ్యాపారాన్ని విజయవంతంగా నిర్వహిస్తారని ఆశిస్తున్నట్లు తన లేఖలో స్పష్టం చేశారు సిద్ధార్థ్.

కాఫీ డే సంస్థ వివిధ బ్యాంకులకు రూ. 8082.63 కోట్ల రుణాలు చెల్లించాల్సి ఉందని సమాచారం. ఐడీబీఐ ట్రస్టీషిప్ సర్వీసెస్​ లిమిటెడ్​కు రూ. 4475 కోట్లు, యాక్సిస్ ట్రస్టీ సర్వీసెస్​కు ​రూ. 915 కోట్లు, యాక్సిస్ బ్యాంక్​కు రూ. 315 కోట్ల రుణాలు కాఫీ డే సంస్థ చెల్సించాల్సి ఉంది.

కాఫీడే చెల్లించాల్సిన రుణాల పూర్తి వివరాలు:

సిద్ధార్థ రుణాలు

సిద్ధార్థ జీవితం

వీజీ సిద్ధార్థ చిక్​మంగళూరులో జన్మించారు. మంగళూరు విశ్వవిద్యాలయం నుంచి ఆర్థిక శాస్త్రంలో పట్టభద్రుడయ్యారు. కర్ణాటక మాజీ ముఖ్యమంత్రి ఎస్​ఎం కృష్ణ కూతురును వివాహం చేసుకున్నారు. 1983-84లో జేఎం ఫైనాన్షియల్​లో మేనేజ్​మెంట్ ట్రైనీగా చేరారు.

శివన్ సెక్యూరిటీస్ అనే స్టాక్ మార్కెట్ కంపెనీని కొనుగోలు చేసి 2000 సంవత్సరంలో వే2వెల్త్ సెక్యూరిటీస్​ లిమిటెడ్​గా పేరు మార్చారు. వెంచర్ క్యాపిటల్ విభాగంలో ఈ కంపెనీ మంచి లాభాలు సాధించింది. కర్ణాటక కేంద్రంగా కాఫీ వ్యాపారాన్ని నిర్వహిస్తున్నారు. చిక్​మంగళూరులో కాఫీ పండిస్తూ... ఏటా 28వేల టన్నుల పంటను విదేశాలకు ఎగుమతి చేస్తుంటారు. మరో 2వేల టన్నులను స్థానికంగా అమ్ముతుంటారు. దక్షిణ భారతవ్యాప్తంగా 200 ఔట్​లెట్ల ద్వారా కాఫీ డే పొడి అమ్మకాలను సాగిస్తున్నారు. జీటీవి, మైండ్ ​ట్రీ, లిక్విడ్ క్రిస్టల్​ సంస్థల్లో బోర్డు సభ్యుడిగా కొనసాగుతున్నారు.

ఇదీ చూడండి: కేఫ్​ కాఫీ డే వ్యవస్థాపకుడు సిద్ధార్థ అదృశ్యం