ఖాతాల నిలిపివేతపై వాట్సాప్​ క్లారిటీ

ప్రముఖ సామాజిక మాధ్యమం వాట్సాప్​ ఇటీవల తీసుకొచ్చిన కొత్త ప్రైవసీ పాలసీ వివాదాస్పదమైంది. కొత్త విధానానికి ఆమోదం తెలపని ఖాతాలు తొలగిస్తారనే ప్రచారం జరిగింది. అందుకు మే 15 గడువు విధించటమూ ఓ కారణం కావచ్చు. అయితే.. మే 15 తర్వాత ఖాతాల నిలిపివేతపై క్లారిటీ ఇచ్చింది వాట్సాప్​.

ఇటీవల తీసుకొచ్చిన కొత్త ప్రైవసీ పాలసీని ఆమోదించకపోయినప్పటికీ.. ఏ ఒక్క ఖాతాను వాట్సాప్​ తొలగించదు. కానీ, వివాదాస్పదంగా మారిన పాలసీకి అంగీకారం తెలపకపోతే.. కొన్ని వారాల తర్వాత వారి చాట్​ జాబితాను పొందలేరు. కనీసం వాట్సాప్​పై ఇన్​కమింగ్​, వీడియో కాల్​కు సమాధానం ఇవ్వలేరు.

ప్రైవసీ పాలసీ నవీకరణకు విధించిన మే 15 గడవు లోపు ఆమోదం తెలపని వినియోగదారులు ఖాతాల తొలగింపు, నిలిపివేయటం వంటివి ఎదుర్కోరని వాట్సాప్​ గతవారమే తెలిపింది. ఎవరైతే అంగీకరించలేదో వారిని అలర్ట్​ చేస్తున్నామని, కొన్ని వారాల తర్వాత ప్రజలకు అందే రిమైండర్లూ నిరంతరం​ మారుతాయని తన వెబ్​సైట్​లో పేర్కొంది. కొత్త విధానాన్ని ఆమోదించే వరకు పరిమితంగానే వాట్సాప్​ పొందుతారని తెలిపింది.

అందరికి ఒకేసారి కాదు..

అందరు వినియోగదారులకు ఒకేసారి ఆంక్షలు ఉండబోవు. కొందరు చాట్​ లిస్ట్​ పొందకపోయినప్పటికీ.. సాధారణ​, వీడియో కాల్స్​ను పొందుతారని పేర్కొంది వాట్సాప్​. నోటిఫికేషన్​ ఉన్నట్లయితే.. వాటిపై క్లిక్​ చేసి సందేశాలకు సమాధానం ఇవ్వొచ్చని తెలిపింది. ఇలా కొన్ని వారాలు కొనసాగిన తర్వాత అప్పటికీ ఆమోదం తెలపకపోతే.. అప్పుడు కాల్స్, సందేశాలు​ ఆగిపోతాయని తెలిపింది.

ఖాతా తొలగింపు ఉండదు..

ప్రైవసీ పాలసీ ఆమోదం తెలపని వారి అకౌంట్​ను తొలగించమని, నిద్రానంలో ఉన్న వినియోగదారుల జాబితాలో చేర్చుతామని పేర్కొంది వాట్సాప్​. సాధారణంగా 120 రోజుల పాటు ఎలాంటి కార్యకలాపాలు జరగని ఖాతాలను వాట్సాప్​ డిలీట్​ చేస్తుంది.

మరోవైపు.. ప్రజలకు పంపే హెచ్చరికలు ఎంత కాలం వరకు కొనసాగుతాయనే అంశాన్ని సంస్థ వెల్లడించలేదు. మరికొన్ని వారాలపాటు రిమైండర్లు కొనసాగుతాయని వాట్సాప్​ ప్రతినిధి ఒకరు తెలిపారు.

" ప్రపంచ వ్యాప్తంగా కొత్త ప్రైవసీ పాలసీ గురించి కొన్ని నెలలుగా వివరిస్తూ వస్తున్నాం. చాలా మంది తమ పాలసీని అంగీకరించారు. ఇప్పటికీ ఆమోదం తెలపని వారికి ఇంకా అవకాశం ఉంది. మే 15 తర్వాత వారి ఖాతాలు తొలగించటం, నిలిపివేయటం జరగదు."

- వాట్సాప్​ అధికార ప్రతినిధి.

ప్రైవసీ పాలసీని అంగీకరించేందుకు మే 15ను తుది గడువుగా ఎందుకు విధించిందనే విషయాన్ని సంస్థ వివరించలేదు.

ఇదీ చూడండి:గూగుల్​ మ్యాప్స్​లో ఆక్సిజన్ పడకల సమాచారం!