అమెరికా ఫెడరల్ రిజర్వ్ అంచనాలకు అనుగుణంగానే కీలక వడ్డీ రేటును పావు శాతం మేర తగ్గించింది. ఫలితంగా వడ్డీరేటు శ్రేణి 2.0 - 2.25 శాతం స్థాయికి దిగివచ్చింది. 2008 ఆర్థిక సంక్షోభం తరువాత ఫెడరల్ రిజర్వ్ వడ్డీ రేట్లను తగ్గించడం ఇదే మొదటిసారి.
అంతర్జాతీయంగా అనిశ్చితి, ద్రవ్యోల్బణం నిర్దేశించుకున్న స్థాయి కంటే 2 శాతం దిగువనే ఉండటం తదితర అంశాలను ఫెడరల్ రిజర్వ్ పరిగణనలోకి తీసుకుంది. వీటిని దృష్టిలో ఉంచుకునే వడ్డీ రేట్లను తగ్గించినట్లు ఫెడరల్ ఓపెన్ మార్కెట్ కమిటీ (ఎఫ్వోఎంసీ) తెలిపింది.
ఆర్థికమాంద్యం లేకుండా, ఆర్థిక వ్యవస్థ పటిష్ఠంగా ఉన్న సమయంలో ఇలా వడ్డీరేట్లను తగ్గించడం 1998 తరువాత ఇదే మొదటిసారి కావడం గమనార్హం.
ఆర్థిక వ్యవస్థకు ఊతమిచ్చేలా వడ్డీ రేట్లను అరశాతం వరకైనా తగ్గించాలని ఫెడ్ రిజర్వ్పై అమెరికా అధ్యక్షుడు డొనాల్డ్ ట్రంప్ ఒత్తిడి తీసుకొస్తున్నప్పటికీ రేట్ల కోతను 25 శాతానికే పరిమితం చేసింది.
చైనా వృద్ధి మందగించడం, బ్రెగ్జిట్ సమస్యతో ఐరోపా సమాఖ్య ఉండటం, అమెరికాలో వ్యాపార పెట్టుబడులు తగ్గడం, కార్పొరేట్ రుణ స్థాయిలు పెరిగిన నేపథ్యంలో ఫెడ్ వడ్డీరేటు తగ్గించడం సరైన చర్యగా కొంత మంది విశ్లేషకులు అభిప్రాయపడుతున్నారు.
ఇదీ చూడండి: సిద్ధార్థ సేవలు కొనియాడిన పారిశ్రామిక దిగ్గజాలు