ఆర్​బీఐ ప్రకటనతో జోష్​- సెన్సెక్స్ 258 ప్లస్

వాహన, ఫార్మా రంగ షేర్ల దన్నుతో దేశీయ స్టాక్ మార్కెట్లు బుధవారం లాభాలను నమోదు చేశాయి. సెన్సెక్స్ 258 పాయింట్లు వృద్ధి చెందింది. నిఫ్టీ 83 పాయింట్లు లాభపడి 11,600 పైకి చేరింది.

స్టాక్ మార్కెట్లు బుధవారం లాభాలతో ముగిశాయి. బీఎస్ఈ-సెన్సెక్స్ 258 పాయింట్లు పెరిగి 39,303 వద్ద స్థిరపడింది. ఎన్​ఎస్​ఈ-నిఫ్టీ 83 పాయింట్ల లాభంతో 11,604 వద్దకు చేరింది.

కరోనా సంక్షోభం నుంచి ఆర్థిక వ్యవస్థను గట్టెక్కించేందుకు అవసరమైన అన్ని చర్యలు తీసుకుంటామని ఆర్​బీఐ గవర్నర్ శక్తికాంత దాస్ ప్రకటించడం మదుపరుల్లో సానుకూలతలు పెంచింది. అమెరికా ఫెడ్​ వడ్డీ రేట్ల ప్రకటన నేపథ్యంలో ఆరంభంలో ఆచితూచి వ్యవహరించిన మదుపరులు చివరి గంటలో భారీగా కొనుగోళ్లు జరపడం లాభాలకు కలిసొచ్చినట్లు విశ్లేషకులు చెబుతున్నారు. అయితే ఈ సారి వడ్డీ రేట్ల కన్నా ఆర్థిక వృద్ధికి ఫెడ్ తీసుకునే నిర్ణయాలపైనే ఎక్కువగా అంచనాలు ఉన్నట్లు అభిప్రాయపడుతున్నారు.

నేటి మార్కెట్ల తీరు...

ఇంట్రాడే సాగిందిలా

సెన్సెక్స్ 39,359 పాయింట్ల అత్యధిక స్థాయి, 39,038 పాయింట్ల అత్యల్ప స్థాయిలను నమోదు చేసింది.

నిఫ్టీ 11,618 పాయింట్ల గరిష్ఠ స్థాయి;11,516 పాయింట్ల కనిష్ఠ స్థాయిల మధ్య కదలాడింది.

లాభనష్టాల్లోనివి ఇవే..

ఎం&ఎం, బజాజ్ ఆటో, సన్​ఫార్మా, హెచ్​డీఎఫ్​సీ బ్యాంక్, ఇన్ఫోసిస్ షేర్లు ప్రధానంగా లాభాల్లో ఉన్నాయి.

ఇండస్​ఇండ్ బ్యాంక్, ఎన్​టీపీసీ, ఎస్​బీఐ, యాక్సిస్ బ్యాంక్, భారతీ ఎయిర్​టెల్ షేర్లు నష్టపోయాయి.

ఆసియా మార్కెట్లు

ఆసియాలో ఇతర ప్రధాన మార్కెట్లలో టోక్యో మినహా.. షాంఘై, సియోల్, హాంకాంగ్​ సూచీలూ బుధవారం నష్టాలను నమోదు చేశాయి.

రూపాయి, ముడి చమురు

కరెన్సీ మార్కెట్​లో రూపాయి బుధవారం 12 పైసలు పుంజుకుంది. దీనితో డాలర్​తో పోలిస్తే మారకం విలువ రూ.73.52 వద్దకు చేరింది.

ముడి చమురు ధరల సూచీ-బ్రెంట్ భారీగా 2.44 శాతం పెరిగింది. అంతర్జాతీయ మార్కెట్​లో బ్యారెల్ ముడి చమురు ధర 41.52 డాలర్లుగా ఉంది.

ఇదీ చూడండి:'వృద్ధికి అవసరమైన అన్ని చర్యలు తీసుకుంటాం'